United-in Ighalo an chelh

Manchester United-in Shanghai Shenhua nen nimin khan inremna an siam a, English club hian January thla tawp thleng Odion Ighalo an chelh dawn.

Kum 30 mi Ighalo hi Manchester United ṭantu ruhkawl a ni a, tun season-ah a club ṭan tana khelhna hun remchang a inhawng.

Season ṭan tirah Ole Gunnar Solskjaer-a'n tlarhma lama an player pawimawh Romelu Lukaku leh Alexis Sanchez te chu Inter Milan-ah a kaltir a, January thlaah Marcus Rashford a inhliam avangin tlarhmaa awm tur player an mamawh.

Nigerian striker Odion Ighalo hian Old Trafford lama a kal theih nan a hlawh a tihniam a, a duhthusam a thleng. Watford striker hlui hian United tan match 10 inlan tawhin goal li a khung a, hei bakah hian khelmualah a theihna a pholan avangin United ṭantute lawm a hlawh hle.

Amaherawhchu Covid-19 vangin Premier League khelh theih a ni lo a, United hian May 31 thleng chauh Shanghai Shenhua nen Ighalo chungchangah inremna an neih avangin Chinese club-ah let tura sawi rik a ni.

Tunah erawh United leh Chinese club-ten inremna an siam a, Ighalo-a'n nakkum January thla tawp thleng English club tan a khel ang.