Denmark an tlawm; Eriksen a tlawm ve lo!

Inrinni zan Euro 2020 khelh a ni a, Denmark leh Finland inkhel khawvelin a thlir ṭhup laiin thil mak a thleng - Denmark thiampuipa leh an innghahna Christian Eriksen chu a tlan lai a tlu a, 'heart attack' a nei niin a lang!

Mangang takin a ṭhianten an bawihsawm nghal a, mak tiin fans an hawihai a, medical team an tlan lut nghal a, Danish midfielder hi a nun chhanhim ngei tumin theihtawp an chhuah.

Finland player-te pawhin hrilhhai takin an hmai an hup a, sawi tur an vai - Denmark player-ten kut insuih chungin an ṭhianpa an bawihsawm lai chu mipui hmuh loh turin an hliah a, a ṭhen an ṭap a, a ṭhen an ṭawngṭai.

Mual sirah Eriksen-a nupui, mipui hmaa inpholan duh lo leh zakzum ve tak Sabrina Kvist pawh a insum zo lo a, Denmark captain Simon Kjaer leh Kasper Schmeichel-ten an kuah a, a mittui chu dan rual a ni lo.

A ṭha e!
Eriksen an nawr chhuak a, player-ten an zui a, European football-a thuneitu sang ber UEFA-in Denmark leh Finland inkhel chu tihtawp lailawk a nih thu an puang zui.

Heti chung hian fan-ten stadium chhuahsan lam an ngaihtuah thei lo a, inkhelh chhunzawm leh chhunzawm loh lamin rilru a luah lo a, Eriksen ṭhat leh ṭhat loh chu ngaihtuahna luahtu ber a ni.

UEFA-in Eriksen chu damdawi ina hruai a nih thu leh a dinhmun a ṭhat thu an puang zui a, Danish FA lamin an player chu a harh thu leh a ṭawng peih thu an sawi thung - rilru tawt a ziaawm ṭan.

A hnu rei vak loah UEFA chuan inkhelh chhunzawm a nih tur thu an puang zui a, first half-a minute li an khelh zawh tak loh chu khelh chhunzawm a ni ang a, minute nga an chawlh hnuah second half an khel leh ang, tih a ni.

An lo kir e!
Inkhel ṭan aṭanga darkar hnih leh minute nga a liam hnuah team pahnih player-ten khelmual an rawn lut a, a tir aṭanga rinawm taka lo nghaktu fan-ten kut beng leh zahna lantir nana ding chungin player-te an lo lawm.

Eriksen tluk hmaa inkhel thununtu chu Denmark an ni a, "Denmark ang chak ang em?" tih ai chuan, "Engtikah nge goal an khung ang?" tih chu zawhna zawk a ni a, player langsar ber pawh Finland goalkeeper Lukas Hradecky a ni.

Bayer Leverkusen keeper hian Jonas Wind-a shot chu ṭha takin a dang a, Tottenham Hotspur midfielder Pierre-Emile Hojbjerg-a ball tauh a lo dante pawh 'world class' huanga dah loh chi a ni lo.

Second half-ah erawh inkhel thawnthu a danglam - Denmark player-ten Eriksen-a ṭha tawh tih hre mah se an thil hmuh leh tawrh khan rilru a nghawng lo thei lo a, a hmaa an inkhel anga khelh an harsat.

A goal
Minute 59-naah Finland-in goal an khung a, Joel Pohjanpalo chuan major tournament-a a vawi khat nana inlan Finland tan goal hmahruai a khung - Bundesliga club Union Berlin striker hian Eriksen-a zahna lantir nan a goal khung a lawm duh lo.

Denmark keeper Schmeichel tan Pohjanpalo ball tauh hi dan theih ni mah se holam takin a chhuah a, Leicester City keeper hian inkhelah 100% rilru a pe thei rih lo niin a lang.

Minute 74-naah team ṭha zawk Denmark-in si phurh sutna remchang an nei a, Paulus Arajuuri chuan Yussef Poulsen-a tih tluk avangin penalty a chawi - mahse, Hojbjerg-a'n chhe zetin penalty a pet a, Hradecky tan dan harsa a ni lo.

Denmark-in hun tawp thlengin goal an khung lo a, rin loh zawk Finland-in hnehna an chang - mahse, Denmark tana pawimawh ber chu point thum a ni tawh lo a, Eriksen-a dam ṭhat chu an tan chuan hnehna a ni.

Lalpa, khawngaih takin...
Eriksen-a tluk hnu lawkah, kum 2012-a Bolton Wanderers tan a khelh laia lo tlu tawh, Fabrice Muamba chuan, "Lalpa, khawngaih takin..." tiin twitter lamah a ziak a, a tawn ang tawng ve Eriksen chu dam chhuak ngei turin a duh.

March 2012-a Tottenham Hotspur nen FA Cup quarterfinal an khelh ṭuma tlu Muamba hi a tluk hnuah vanneihthlak takin a harh chhuak leh a, mahse, inkhelh erawh phalsak a ni tawh lo. Muamba chuan, "Ka lo theihnghilh tawh, hriatreng ka duh loh kha a rawn chawk tho thar leh a, eng thil nge thleng zel dawn hre miah lo a, hla tak aṭanga ka thil tawn tawh lo en kha hrehawm tak a ni," a ti.

Inkhelh a chawlhsan hnua journalism leh coaching lama inhmang zui Muamba chuan, "En a hrehawm a, medical staff-te khan fak an phu. A khelhpuite khan an tih tur tak an ti bawk," tiin a sawi.

Duhtak Denmark, in chungah kan lawm e!
Denmark leh Finland inkhelh laiin nikhaw hre loin Eriksen a tlu a, khawvelin hlauthawng takin a thlir - mahse, chu chhiatna phenah chuan hringnun timawitu phochhuahin a awm a, sawi loh atana uiawm a ni. Eriksen tluk ruala a khelhpui, fans, medical team leh match official thlenga an chet dan chu khawvelin a fak rawn a ni a, kha thil thleng rapthlak tak a thlen lai khan anni ho 'kher' kha Eriksen-a kinga awm ni lo se thawnthu a danglam mai thei - mahse, an awm miau a, hringnun hi a mawi kan ti thar leh ta a nih hi.

Captain Fantastic
Throw-in aṭanga ball dawn tuma tlan phei Eriksen-a tlu a, Tottenham Hotspur midfielder hlui bula tlan phei hmasa chu Denmark captain Simon Kjaer a ni a, hruaitu ṭhain a tih tur ang zawng zawng chu a tinghal vek.
AC Milan centre back Kjaer hian khelmuala tlu reng a ṭhianpa a harh leh theih nan a ṭhianpa awmah a nam a, a lei a seh palh loh nan a taksa a siamremsak bawk. Hei mai a ni lo - Eriksen-a nupui chu Schmeichel nen an hnem a, an tih tur dik tak an ti.

Fak tlak player
Denmark mai ni lo, Finland player-ten medical team lamte chu hmanhmawh turin an kutin an hui a, an tih theih ang ṭheuh chu tih tumin theihtawp an chhuah tlang tih chiang takin a lang. Khelmual chhunga Eriksen enkawl a nih laiin Denmark player-ten an ṭhianpa hi an din hual a, harsatna tawka a talbuai lai hi khelmuala fans 15,200 pungkhawm leh television lama lo thlirtu maktaduai telin an hmuh loh nan an hliah tlat - an thawk ṭha takzet.

Kasper, i ti ṭha e...
October 27, 2018 khan Leicester City neitupa Vichai Srivaddhanaprabha chu helicopter chesualah a thi a, hetihlaia a hmun thleng hmasa pawl chu Kasper Schmeichel a ni a, a pa Peter Schmeichel chuan, "Midang ṭanpui duhna rilru pua ti a nih avangin ka chhuang a, mahse, helicopter alh hluah hluah lam pana a tlan avang erawh chuan ka lawm lo a ni," tiin a lo sawi tawh.

Midangin harsatna an tawh laia awm mai mai thiam lo Kasper hi Eriksen bawihsawm a nih lai pawhin a awm mai mai lo a, Kjaer kiangah dingin Eriksen-a nupui a hnem. The Times chief football writer Henry Winter chuan, "Danish player-te kha khelho an ni satliah lo a, ṭhian ṭha an ni. Kjaer leh Kasper te khan Eriksen-a'n ṭanpuina a mamawh lai takin an tih tur an ti a ni," a ti.

Medical team kha...
Eriksen-a'n buaina a tawh ruala langsar tak chu medical team kha an ni a, khatiang tak khan che rang lo se chuan Eriksen kha an chhan hman kher lo mai thei a ni. Denmark team doctor Martin Boesen chuan, "Eriksen-a bul ka thlen khan a thaw chu a la awm a, a marphu pawh a la awm.

"Mahse, thawklehkhatah an tawp phut a, CPR kan pe zui. Medical team leh staff dang zawng khan rang takin min rawn pui a, Christian kha kan chhan leh theih phah a ni. Damdawi in kan hruai hma kha chuan a ṭawng peih tawh," a ti a, FA expert cardiology consensus panel chairman, Sports cardiologist Professor Sanjay Sharma chuan, "Medical team rang taka an che khan a nunna a chhan a ni," a ti bawk.

Fans an bang lo
Fak tel loh theih loh chu inkhel entu fan-te kha an ni. Finland fan-ten an khingpui player ni mah se "Christian" tia auin Danish midfielder dam leh nan aw an chhuah a, Denmark fan-ten "Eriksen" tia auin an chhawn thung - buaina thlen thei dang thil an buaipui lo a, an duh ber chu Eriksen-a harh chhuah leh a ni.

Eriksen zawn chhuah a nihin puan hmangin zar hliah a ni a, he puan hi Finland 'flag' a ni a, inkhel entu fan-ten Eriksen zar hliah a nih nan an pe.

Hnathawk ṭha Taylor
Eriksen-a tluk ruala pawimawh ber pakhat chu match official-te an ni a, Denmark vs Finland inkhel enkawltu English referee Anthony Taylor-a'n chi ai miah loa ruahmanna a kalpui dan kha fak tlak a ni. Manchester khaw chhuak referee hian Eriksen-a tlu a hmuh rualin inkhel a titawp nghal a, medical team-te chu khelmual chhunga rang taka lut turin a ko a, khelmual pawn lamah player-te a hruai chhuak bawk.

A harsa a ni - Denmark coach
Eriksen-a'n harsatna a tawh hnuah Denmark player-te chu duhthlan tur pek an ni - an duh chuan an inkhelh chhunzawm thei a, a tuk tlaiah an khelh chhunzawm thei bawk. Eriksen-a dinhmun a ziaawm tih an hriat hnuah Danish player-ten inkhelh chhunzawm an thlang a, mahse, khelmualah ngai an la awh lo tih a lang zui a, an hneh tura ngaih Finland lakah 1-0 in an tlawm.

Denmark head coach Kasper Hjulmand chuan, "Ka player-ten khan zaninah an mu thei dawn chuang lo tih an inhria a, mu lo chunga a tuka inkhel tura chhuah ai chuan inkhelh zawh nghal mai kha an tan a awlsam zawk a ni.

"Zan harsa tak a ni a, kan nuna pawimawh ber chu kan chhungte leh ṭhian ṭhate nena inkungkaihna ṭha tak neih hi a ni tih chu zaninah khan hrilh hriat tharin kan awm leh ta a ni," tiin a sawi. Hjulmand chuan sawi zawmin, "Rilru tawt tak chungin kan inkhel a, player-te tan chuan a harsa tawh a ni. Hnehna chan ngei kan tum a, khatiang rilru hrehawm tak pu chunga khelmual an lut ngam kha ka player-te ka chhuang takzet.

"A nihna dik takah chuan ka player ṭhenkhat khan inkhel zui turin tha an nei tawh lo. An thinlung a nghing a, an tan a harsa tawh. Ka player-te khan inkhelh duh lo ta pawh ni se, ka dem hauh lo ang," a ti. Denmark boss chuan, "Therapy session thlengin kan nei ang a, min pui tur an awm ang," a ti a, inelna hmachhawn zui zel turin a player-te chuan enkawl an mamawh thu a sawi - Hjulmand hian mittui tla chungin press conference a hmachhawn.

Chris, kan hre reng che...
Belgium-in 3-0 in Russia an hneh a, goal hnih khungtu Romelu Lukaku chuan TV camera hmaah, "Chris, ka hmangaih che," tiin a goal khung a ṭhianpa tan a hlan a, Inter Milan tana a khelhpui player hi a theihnghilh lo.
Eriksen hian January 2020 khan Inter hi Spurs aṭangin pound maktaduai 16.9-in a zawm a, kum 11 hnua a vawi khat nan Italian club hi Serie A nomawi a chawipui a ni.

Lukaku chuan, "Russia nena kan inkhel kha a nuam ka ti a, mahse, ka tan chuan khelh a harsa takzet a, ka rilru khan Chris a hre reng tlat a ni. "Ka hlauhthawn em avangin ka ṭap a, hun tam tak ka hmanpui a nih miau avangin a harsa a ni. A nihna takah chuan ka chhungte ai pawhin Chris nen hian hun kan hmang tam zawk a, amah mai ni lo, a kawppui, a fate pahnih leh a chhungte ka hre reng a ni," a ti.

Eng nge an sawi?
Christian hi a dam leh vat ka duhsak a, a chhungten chakna leh rinna nghet tak an neih theih nan ka ṭawngṭaisak a ni. Team pahnih fan-te a hming lama an au rual lai kha ka hmu a, Chris-a'n mawi taka a khelh ṭhin football hi mawi ka ti ṭhin. - Aleksander Ceferin, UEFA President

Chris, ṭang rawh aw, i kiangah kan awm tlat a nia. - Italy legend Francesco Totti

Chris, hlauthawng suh, kan ngaihtuahna chu i kiangah a awm reng e. - Inter Milan

Chris, theihtawp chhuah rawh aw, i lam kan ṭang tlat ania. - Italy national team

Christian, lo dam vat rawh. Spurs chhungkua chu i kiangah kan awm reng e. - Tottenham Hotspur

Chris, ṭang rawh, khawngaih takin ṭang rawh. - Lautaro Martinez (Inter Milan tana a khelhpui)

Christian Eriksen-a chhungkua, a ṭhiante leh Danish national football team-te duhsakna kan hlan a, an kiangah kan awm reng e. - Thomas Bach, International Olympic Committee President

Christian Eriksen leh a chhungte kan hre reng a ni. - Gianni Infantino, FIFA President