Mancini kaihhruai Italy an ṭha

Euro 2020 opening match-ah Italy-in Turkey 3-0 in an sawp a, Roberto Mancini hoten champion thei turin an ṭha tawk tih an pholang. Azzuri hian June 16, Nilaini zanah Switzerland an hmachhawn leh ang.

Stadio Olimpico, Rome-a inkhelah Turkey defender Merih Demiral-a'n an lamah a ti lut a, inkhel thununtu Italy tan Ciro Immobile leh Lorenzo Insigne ten an khung belh.

Boruak a nung
Opening ceremony ropui taka hman a ni a, Stadio Olimpico-ah entu 12,916 an pung khawm. Martin Garrix, Bono leh The Edge chevelin beng leh mit an ti tlai a, Italian opera tenor Andrea Bocelli-a'n hnehsawh tak maia 'Nessun dorma' a rawn sak hnu phei chuan stadium boruak a nung ṭha takzet.

Italy-in an hnam hla an sa a, player leh coaching staff-in an thinlung takin uar takin an sa a, mipui lamin an zawm ve bawk. Euro 2020 hmachhawn turin Azzuri an inpeih ta hle.

Turkey an fimkhur
World Cup 2002-a Turkey pathumna nihpuitu Senol Gunes-a'n a khingpui Italy a hrechiang a, goal venhim a ngai pawimawh hle. Azzuri hian September 10, 2018 hnuah hneh loh an tawng tawh lo a, goal venhim an thiam bakah goal an khung thei bawk.

Roberto Mancini-a'n friendly match-a Czech Republic 4-0 a an hneh ṭuma bul ṭantute bawk a rawn luhtir a, ṭan phat aṭangin an nawr na hle. Immobile leh Insigne ten Trukey tlarhnung tan hna an siam tam hle.

Amaherawhchu Turkey lamin goal venhim tumin tlarhnungah player an hnawh hnem a, defence laiah Leicester City defender Senol Gunez leh Juventus defender Merih Demiral te an awm bawk nen tlarhnung a khawng ṭha hle.

Chutihrualin Azzuri an vanduai ve bawk. Napoli captain Lorenzo Insigne-a'n chance ṭha bik chu goal zawnah a pet lo a, first half hma deuhin Italian left back Leonardo Spinazzola cross-in Turkey defender Zeki Celik-a kut per mah se penalty pek an ni lo.

Italy nge nge
Azzuri hian Euro khel tur hian match 10-ah an khingpui an hneh vek a, goal 37 tehmeuh an khung. Second half-ah Senol Gunes-a hoten rawn nawr ve hret an tum avangin tlarhnung a ruak a, Italy-in an hmang ṭangkai nghal.

Minute 53-naah Domenico Berardi chuan ding lam aṭangin ṭha zetin a lalut a, a cross ball ṭha zet chu Demiral-a'n an lamah a ti lut. Italy-in goal khat an khung hnuah an nawr na sawt a, Spinazzola ball pet chu keeper Ugurcan Cakır-a'n dang mah se a per chu Ciro Immobile-a'n minute 66-naah chiang takin a khung.

Khelmual chhunga te fal ber 5ft 4in leka sang Lorenzo Insigne-a'n minute 79-naah a khung belh leh bawk a, Italy 3-0 in an chak. Azzuri player-ten ball an chan loh ṭumah pawh pressure an pek ṭhat avangin Turkey player-ten awmze neiin an nawr thei lo.

Chutihrualin Lille champion puitu forward Burak Yilmaz-a'n second half-ah chance ṭha a nei a, goal-ah ṭha takin pet mah se Giorgio Chiellini-a'n ṭha takin a dang hman. Italy-in inkhel an thunun a, an mualah vek an inkhelh dawn bawk avangin awlsam takin last 16 an luh a rinawm hle.

Match hmasa ber a ni a, team ṭha tak kan tum nachungin kan khel ṭha. Mipuiin min pui a, rang taka ball kan inpe thei kha kan ṭhatpui a ni. - Roberto Mancini, Italy coach

Ball kha hmun tinah kan sem darh a, Turkey kha tih chauh kan tum. First half-ah kan su tlang thei lo a, second half-ah Turkey kha keini aiin an chau zawk. Goal khat a luh hnu kha chuan goal venhim ringawt an ti thei ta bik lo a, kan theihna kan pholang a ni. - Ciro Immobile, Italy striker

Mancini khan dawhthei tur leh inkhela rilru pe turin min hrilh a, a thu kan zawm. A tawpah hlawhtlinna kan hmu. Kan team-ah hian bul ṭan tur leh bench-a awm tur an awm chuang lo a, inlungrual takin team tan kan khel a ni. Kan tan chuan chak a pawimawh ber. - Lorenzo Insigne, Italy forward

Inelna thlengtu zinga mi kan hmachhawn a, keini aiin an ṭha zawk. Italy kha keini aiin inelna hmachhawn turin an inpeih a ni. Tournament a ni a, match hnih khelh tur a la awm. Wales nena kan inkhel tur atan kan inpuahchah ang. - Senol Gunes, Turkey coach

B. Team pahnih emaw aia tam emaw point hmuh zat a inang a nih chuan
• Head to head points
• Goal Difference (Head to Head)
• Goal khung (Head to Head)
Dinhmun ṭha zawk a la hriat loh chuan
• Goal Difference (Group match pumpui)
• Goal khung zat (Group match pumpui)
• Group match-a chak ngah zawk
• An la intluk zel a, team pahnih chauh an nih a, group match hnuhnung bera an inhelh bawk chuan penalty shootout hmanga chak zawk zawn tur a ni.
• Disciplinary point hmu tlem zawk (YC -1 pt, 2YC - 3 pts, RC - 3 pts, YC+RC - 4 pts)
• European Qualifiers overall ranking-a dinhmun ṭha zawk.