Lukaku-a'n goal hnih a khung nghal

Inrinni zan khan Belgium-in Russia 3-0 in an hneh a, Inter Milan striker Romelu Lukaku-a'n goal hnih a khung. Belgian striker Lukaku hian a goal khung hi club tana a khelhpui Christian Eriksen tan a hlan.

FIFA ranking-a number 1 Belgium hian June 17, Ningani zanah Denmark an hmachhawn leh dawn a, Manchester City midfielder Kevin de Bruyne pawh inlan thei tawh tura beisei a ni.

Goal khung thiam
Belgium-in qualifying-ah goal 40 an khung a, goal an khung tam ber. Russia nen hian goal khung turin minute 10 bak an mamawh lo a, Dries Mertens-a ball vawrhluh chu Russia defender Andrei Semenov-a'n hmun himah a petchhuah theih loh avangin Lukaku-a'n goal hmahruai a khung.

Mertens-a'n ball a vawrhluh hian Lukaku hi offside position-ah a awm a, Inter Milan striker hian Russian defender Semenov a tihbuai loh avangin goal-ah pawm a ni. Minute 27-na lekah inhliam vangin Timothy Castagne chu Thomas Meunier-a'n Borussia Dortmund right back hian goal a rawn khung nghal.

Minute 34-naah Russia keeper Anton Shunin-a'n cross ball chu man nghet loin a ti per a, Meunier-a'n chiang takin a khung. Minute 88-naah Meunier-a through ball chu Lukaku-a'n um lutin Manchester United striker hlui hian ṭha takin a pet goal.

Russia-in Belgium an ngam lo a, first half-ah player pahnih Daler Kuzyaev leh Yuri Zhirkov te an inhliam avangin hna a harsat belh. Stanislav Cherchesov hote hian last 16 thlen an tum a nih chuan Finland an hmachhawn hunah point an hlawhchhuah ngei a ṭul tawh ang.

Eriksen-a tan
Romelu Lukaku-a'n goal a khung zawhah camera hmaah, "Chris, Chris, ka hmangaih che," tiin Christian Eriksen tan a goal khung a hlan. Inkhelh banah Lukaku chuan, "Hun hlimawm tak tak kan hmang dun a, a chanhin ka hriat khan ka hlauthawng takzet a ni. Ka chhungte aiin hun kan hmang dun tam zawk a, inkhelh pawh a harsat phah hle. Zanin kan inkhel kha Eriksen tan ka hlan," tiin a sawi.

Russia coach Stanislav Cherchesov chuan, "Result awm tak niin ka hria. Kha aia inhnaih tur chu kan ni a, amaherawhchu tihsual ho te te avangin kan inkar a zauh phah. Match li kan inhmachhawn ta a, vawi khatmah kan hneh lo," tiin Belgium chu team ṭha zawk an nih thu a sawi.