Wales tan Moore

Euro 2020-ah Wales-in Kieffer Moore goal hmangin Switzerland an chelh a, point khat hlu tak an hlawh chhuak.

Baku Olympic Stadium-ah Switzerland-in inkhel an thunun a, Breel Embolo hmangin minute 49-naah goal an khung hmasa. Wales-in hneh lo zawk mah se Kieffer Moore-a'n minute 74-naah siphurh a sut a, 1-1 in an inhnehtawk.

Swiss an ṭha
Wales-in Gareth Bale, Aaron Ramsey leh Daniel James te kawl mah se Switzerland an ngam lo. First half-ah Breel Embolo-a'n nasa takin Wales tlarhnung a rum ṭhaih a, Haris Sefe-rovic-a'n chance ṭha a hlah nual bawk.

Keeper Danny Ward a che ṭha a, season thum chhung league match khel tawh lo Leciester City keeper hian Wales tan beiseina a siam.

First half-ah goal a lut lo a, second half-ah erawh Breel Emobolo-a'n goal a khung ta nge nge a, Borussia Monchengladbach forward hian minute 49-naah Xherdan Shaqiri corner pet chu a tauh lut.

Chhandamtu Moore
Euro 2016-a semifinal hial thleng pha Wales tan beisei tur a tlem a, kum 28 mi Kieffer Moore-a'n beiseina a rawn siamsak. Championship club Cardiff City star Moore hian minute 74-naah siphurh sutna goal a tauh lut.

Feet ruk leh inches ngaa sang Moore hian first half-ah pawh a lu hmangin goal a khung teuh hle. Chutihrualin Wales an vannei tel a, Switzerland subsitutute Mario Gavranovic goal khung chu VAR hmanga ennawn a nih hnuah offside vangin pawm a ni lo.

Eng nge an sawi?

Swizerland tana goal khungtu Breel Embolo chuan, "Goal hnihna khung thei turin hun ṭha kan nei a, kan hmang ṭangkai lo. Goal khat kan khung hnuah kan fimkhur mah mah a ni thei. Chutihrualin chak kan phu a, kan inhnehtawk hi pawi ka ti hle," tiin a sawi.

Wales coach Robert Page chuan, "Point khat kan hlawhchhuah dan kha a lawmawm em a, chak ang mai kan ni. Kan vannei takzet a, chutihrualin team boruak a ṭhat phah hle," tiin a sawi.