Messi hoin Argentina inlan dawn

A vanglai a pel ve mek a, player ṭha bik Lionel Messi tan football khelhna hun a tam tawh bik lo. Argentina tan phei chuan match tam a khel tawh kher lo mai thei, chuvangin Messi tan Copa America 2021 hi a hluin a pawimawh hle.

Argentina hian zanin dar 2:30 hian an group match hmasa ber atan Chile an hmachhawn dawn. Ram pahnih hi champion tum ve ve an nih avangin a hmuhnawm nghal ang, an neih ṭhat an thawh chhuahpui dawn.

Nomawi kan duh
Barcelona tan nomawi chawi theih zawng zawng a chawi kim a, mimal chawimawina hlu leh sang pawh a dawng kim. Mahse, player ṭha fal bik tak pawh ni se a hlawhtlina tawhna an sawi a piangin 'mahse' tih chu a zuitu a ni ṭhin.

Messi hian ram tan nomawi a la chawi lo, Copa America final vawi thum leh FIFA World Cup final vawi khat a khel tawh; a vanduai zawkah a la ṭang vek, tun ṭumah hian ṭha taka khelh ringawt ni loin nomawi an duh thu a sawi.

Kum 33 mi Messi chuan, "Camp mumal kan nei thei lo, mahse qualifying kan khelho reng a, kan thawhrim bawk avangin kan inpeih. Qualifier kan khelh hmasak lam ai kha chuan nasa takin hma pawh kan sawn tawh.

"Copa America hnuhnung pawh kha kan khel ṭha hle, mahse khelh ṭhat ringawt kha a tawk lo, hlawhtlinna in zui se tih hi kan duhdan leh duhthusam chu a ni. Kan squad-ah hian player ṭha leh tawnhriat ngah an tam a, coach Lionel Scaloni hnuaiah kan thawhhona a ṭha bawk," tiin a sawi.

An ṭha tawk
Argentina hi Lionel Messi chauha innghat an ni lo, tlarhma lamah pawh Barcelona striker thar Sergio Aguero leh Inter Milan duhlai Lautaro Martinez te an awm a, anni thlawp tur hian Angel Di Maria a awm bawk - tlarhma lam chu an ngaihtuahawm lo tura ngaih a ni.

Midfield awp turin PSG player Leandro Paredes an nei a, ani hi World Cup qualifier lama rinrawl a nih avangin Copa-ah pawh a pawimawh dawn. Atletico Madrid champion puitu Angel Correa nen an inkawp rem a nih chuan an en tham ang.

Tlarhnungah Nicolas Otamendi chu rinrawl a ni dawn a, Manchester City defender hlui hian tawnhriat a nei ṭha. Fiorentina tlarhnung luahtu Lucas Martinez Quarta nen an inkawp a rinawm a, position tin thlir chuan defence hi an panna lai tak niin a lang thung.

Arsenal player a nih laiin Emiliano Martinez tan inkhelhna hmun a awm meuh lo. Argentine keeper hian inkhelh tam duh vangin Aston Villa a pan a, a tifuh. Premier League-ah a theihna a pholang a, ram tan pawh match hnuhnung pahnihah si ban a nghak - Chile lakah a inlan a rinawm.

Sanchez tel lohna
Chile hian Argentina nena khaikhin chuan player an nei ṭha lo zawk a ni mai thei, mahse ram hmangaihna nen huaisen taka an beih ṭhin avang team hlauhawm ber zinga mi an ni leh dawn. Mahse, tun ṭumah hian Alexis Sanchez chu a tir lamah an chhawr thei dawn lo.

Inter Milan forward hi chawn hliam vangin enkawl a ngai a, a ṭhiante zingah a la awm thei lo. Arsenal player hlui hi inelna zawh hma chuan dam hman tura beisei a ni a, group stage khel thei dawn lo mah se quarterfinal china a inlan theih beiseiin squad-ah an tel.

Chile hian 2015 leh 2016 khan Copa America nomawi hi an chawi a, an hlawhtlin ṭuma an hotupa Claudio Bravo chu tun ṭumah hian a la inlan thei dawn a, midfielder Arturo Vidal an la neih bawk avangin eng team mah an hlau bik lo ang.

Club aia ram tana ṭha ṭhin Eduardo Vargas pawh a la awm cheu; Atletico Mineiro striker hian Chile tan match 95 a khelh aṭangin goal 38 a khung a, tlarhma lama a kawppui ṭhin Sanchez a awm dawn loh avangin a chungah mawhphurhna a sang zual dawn.

Argentina Squad:
Goalkeepers: Franco Armani (River Plate), Emiliano Martinez (Aston Villa), Agustin Marchesin (Porto), Juan Musso (Udinese).
Defenders: Gonzalo Montiel (River), Nicolas Otamendi (Benfica), German Pezzella, Lucas Martínez Quarta (Fiorentina), Nicolas Tagliafico, Lisandro Martínez (Ajax), Marcos Acuna (Sevilla), Cristian Romero (Atalanta), Nahuel Molina Lucero (Udinese).
Midfielders: Leandro Paredes, Angel Di Maria (Paris Saint-Germain), Guido Rodriguez (Betis), Giovani Lo Celso (Tottenham), Exequiel Palacios (Bayer Leverkusen), Nicolas Gonzalez (Stuttgart), Rodrigo De Paul (Udinese), Alejandro Gomez (Sevilla), Angel Correa (Atletico Madrid), Nicolas Domínguez (Bologna).
Forwards: Lionel Messi (Barcelona), Lautaro Martinez (Inter Milan), Joaquin Correa (Lazio), Lucas Alario (Bayer Leverkusen) and Sergio Aguero (Barcelona).

Chile Squad:
Goalkeepers: Claudio Bravo (Betis), Gabriel Arias (Racing), Gabriel Castellón (Huachipato FC).
Defenders: Daniel González (Santiago Wanderers), Mauricio Isla (Flamengo), Guillermo Maripán (Monaco), Gary Medel (Bologna), Eugenio Mena (Racing), Enzo Roco (Fatih Karagümrük), Francisco Sierralta (Watford), Sebastián Vegas (Monterrey).
Midfielders: Tomás Alarcón (O’Higgins), Charles Aránguiz (Bayer Leverkusen), Pablo Aránguiz (Universidad de Chile) Claudio Baeza (Toluca), Pablo Galdames (Vélez Sarsfield), Marcelino Núñez (Universidad Católica), Carlos Palacios (Internacional), César Pinares (Grêmio), Erick Pulgar (Fiorentina), Arturo Vidal (Internazionale).
Forwards: Luciano Arriagada (Colo Colo), Ben Brereton (Blackburn), Clemente Montes (Universidad Católica), Jean Meneses (León), Felipe Mora (Portland Timbers), Alexis Sánchez (Internazionale), Eduardo Vargas (Atlético Mineiro).