UFC 263: Adesanya-a'n title humhim turin Vettori a hneh
UFC middleweight champion Israel Adesanya chuan Marvin Vettori lakah a title kawl lai a humhim leh ta a, nimina fight hmuhnawm takah Nigerian fighter hi unanimous decision (50-45, 50-45, 50-45) hmangin chak zawkah puan a ni.
April 2018 khan fighter pahnih hi an lo intawng tawh a, split decision hmangin Adesanya hian hnehna a lo chang tawh - nimin an fight-ah erawh judge-te ngaihdan a inang a, hneh takin Israel Adesanya-a'n a title kawl lai a humhim.
UFC 263-a fight ngaihven hlawh dangah Brandon Moreno chuan Deiveson Figueiredo chu round thumnaah submission hmangin a hneh a, UFC Flyweight champion thar a ni.
Vettori a huai
Gila River Arena, Glendale-a fight neihah a tir aṭangin Vettori-a'n Israel Adesanya a ngam a, huaisen takin a attack ngam - mahse, zawi muangin Adesanya a insiamrem thuai a, a kut leh ke a hmang kawp a, Vettori a talbuai zui.
Adesanya-a'n fight a thunun a, Vettori a talbuai a, a team lam pawhin hei hi an hmuh hmaih lo - a coach Rafael Cordeiro chuan huaisen taka Adesanya chu nawr chhunzawm turin a ti a, mahse, Vettori thiamnain a tlin tawh lo.
Adesanya-a'n fight a thunun chhunzawm a, round nga an fight zawh meuh chuan judge thutlukna an puan hma hauhin a chak tur zawk a chiang tawh - judge thutlukna an puang ta ngei a, pathumin Adesanya hi chak zawkah an puang vek.
Vake, i tan
Kum 31 mi Adesanya-a'n a title a humhim a, May-a beih rawn a nihn lama nunna chan ta Fau Vake hriatreng nan a hlan thu a sawi - Vake hi fighter beiseiawm tak, Adesanya nena training dun ṭhin a ni.
Adesanya chuan, "Fau Vake, Fau Vake, Fau Vake, ka hmangaih tak zet che tih hi ka sawi duh a, he fight hi i tan ka hlan a ni," tiin a ṭhianpa tan a hnehna chan chu a hlan thu a sawi.
Vawi 22 fight-a hmachhawna hnehna la chang vek Adesanya chuan Robert Whittaker a cho zui a, "Tunah erawh kan khuaah tih ve a ngai tawh ang," a ti - fighter pahnih hi Melbourne khawpuiah kum 2019 khan an lo intawng tawh a, Adesanya hi New Zealand lama inbengbel a ni.
Champion thar
Brandon Moreno chuan UFC flyweight champion lai Deiveson Figueiredo chu rear-naked choke hmangin a tlawm a, kum 27 mi fighter hi UFC flyweight champion thar a ni.
Moreno-a'n MMA-a fight a hmachhawn 26-a vawi 19 hnehna a channa a ni a, vawi nga tlawm tawhin vawi hnih a khingpui a inhnehtawkpui - kum 2016 lawka The Ultimate Fighter-a seeded 16-na ni chunga hun hmang hi tunah chuan UFC champion a ni ta.
December 12, 2020 khan Deiveson Figueiredo nen hian inhnehtawkah puan an lo ni tawh a, kum 2021-a herchhuah meuh erawh chuan Moreno nihna tak hrilh hriatin kan awm.