Clippers beiseina a la nung zel

Los Angeles Clippers chu Utah Jazz lakah tlawm mai an tum bik lo. Clippers hian nimin zing khan Jazz hi 132-106 in an hneh a, NBA Western Conference semifinal series-ah Jazz hi 2-1 in a la chungnung thung.

Game hmasa pahnihah Jazz an chak ve ve a, seeded pakhatna hian harsa vak loin conference final an lut dawn niin a lang hman. Mahse game 3-ah Clippers tan Kawhi Leonard leh Paul George te pahnih chuan point 65 thawk chhuakin team an chakpui.

Clippers head coach Tyronn Lue chuan, "Ka player ṭha pahnihte kha khatiang taka khel chhuak tur khan ka mamawh a ni, anni pahnih khan an thawh hlawk em em a, player dangte tan kawng an sialsak nghal bawk tihna a ni," tiin a sawi.

Regular season laia match 52 zet chak thei Jazz hian an player ṭha Mike Conley chu malpui hliam vangin an la chhawr thei lo, a zawnin match thum a chawl ta. Point 30 neitu Donovan Mitchell pawh kerek hliam vangin hun tawp lam minute sarih chhung a khel thei lo bawk.

Team pahnih hian June 15, Thawhlehni zing dar 5:30-ah game 4 an khel leh ang, tlang tur chuan vawi li chak tlin phawt a ngai.

Inrinni zing khan Western Conference semifinal lamah Phoenix Suns chuan Denver Nuggets lakah 116-102 in hnehna an chang a, best of seven series-ah 3-0 in hma an hruai ta. Tukin hian game 4 an khel a, an chak a nih chuan conference final an lut ang.

Suns hian season duhawm an hmang, regular season bikah khan vawi 51 chakin table-ah pahnihna dinhmun an luah. Playoff an khelh hnuhnung parukah an chak vek a, 2009-10 hnua a vawi khat nan conference final an beisei mek.