Lewandowski inlan zan

Zanin dar 9:30 hian Poland leh Slovakia te Krestovsky Stadium, St Petersburg-ah an inkhel dawn. Group E-ah hian Spain leh Sweden an awm bawk a, last 16 luh a awlsam dawn lo.

Poland hian tun dinhmuna khawvela striker ṭha ber Robert Lewandowski an kawl a, Bayern Munich striker hian Euro 2020-ah hming chher a tum dawn. Lewy hian Euro 2012-ah goal khat chiah a khung a, group mawngphahah an awm.

Euro 2016-ah pawh Lewy a che ropui tawk lo. Poland-in group stage an paltlang a, Lewandowski hian goal khat mah a khung lo. Bayern striker hian last 16-a Switzerland an hneh ṭumin penalty shootout-ah goal a khung a, hun pangngaiah erawh quarterfinal-a Portugal an hneh loh ṭum chiahin a khung.

Tun hnai season hnih chhungin Lewandowski hi a che ṭha lehzual a, season liam ta khan Bundesliga-ah goal 41 khungin record thar a siam a, inelna danga a khung nen goal 48 a ni. Bayern striker hi 2019–20-ah a la che ṭha lehzual a, season khat chhungin inelna hrang hrangah goal 55 tehmeuh a khung a, a record hi a chhuanawm tham hle.

Bayern striker Lewy hi club football-ah chuan striker ṭha ber a ni a, ram tan erawh ber a ni lo thung. Euro 2020 khel tur zawnna qualifying round-ah Lewy hian goal ruk a khung a, amah aia khung tam player 11 zet an awm.

Lewy hian football khawvela a ropuina belhchhah a duh a nih chuan Euro C'ship-ah record a neih ṭhat a ṭul a, Poland striker langsar dang Krzysztof Piatek leh Arkadiusz Milik te an inhliam avangin a mawhphurhna a sang lehzual ang.

Group E-ah Slovakia hi team nem bera ngaih an nih avangin Poland tan chak ngei a ṭul. Chutihrualin Slovakia hian Inter Milan champion puitu defender Milan Skriniar, captain Marek Hamsik leh Newcastle United keeper Martin Dubravka te an kawl avangin Poland tan point thum hmin sa a tih theih loh.