June-ah Murray inkhel dawn

Hliam vanga season hnih deuh thaw a inkhelh mumal loh hnuah Andy Murray a dam tawh a, June thla tawp lam hian a unaupa Jamie buatsaih UK National Health Service charity-ah a inlan dawn.

Jamie-a inelna buatsaih tur hi a hmunah entu awm dawn lo mah se ṭanpuina pe duh tan kawng siam a ni dawn a, an sum tuak chhuahte hi coronavirus vanga harsatna tawkte ṭanpui nan hman a ni ang.

Inelna hi June 23-28 chhunga neih tur a ni, Britain player langsar Murray unau bakah hian tualchhung tlangval pahnih Kyle Edmund leh Dan Evans te pawh an inlan dawn. 

Wimbledon vawi hnih champion tawh Murray hi a khel bawr hliam vangin a buai ngun hle a, dam ve deuh mah se hliam dangin a tlakbuak leh ṭhin; tunah hian thla thum chhung vel inkhel loin a awm mek.

World number 1 hlui Murray chuan, "Tennis khelh hi chu engtiklai pawhin ka chak reng, tournament pangngai khel tur la ni rih lo mah ila midang ṭanpui nana inkhelh pawh a nuam em em vek," tiin a sawi.