England-in Croatia an hneh

England-in 2018 World Cup semifi nal phuba an la a, nizan khan Euro 2020-a an match hmasa ber Wembley Stadium-ah khelin Croatia 1-0 in an hneh.

Goal awm chhun hi Raheem Sterling-a khung a ni a, Manchester City forward hian England tan inelna lian thama a goal khung vawi khatna a ni. Three Lions hian June 18, Zirtawpni zanah Scotland an hmachhawn leh ang.

Shaw leh Chilwell?
England a nih tawh chuan inkhelh hma hauh aṭangin boruak a sang nghal ṭhin a, Gareth Southgate-a player thlan turah pawh an inrinsiak nasa. Left back-ah Luke Shaw nge Ben Chilwell a chhawr dawn tiha an inhnial laiin Southgate-a'n ke dinglama pet Kieran

Trippier a thlang daih. Tlarhnungah Harry Maguire a la dam loh bawk avangin John Stones leh Tyrone Mings te an inkawp a, mual sirah Trippier leh Kyle Walker te an awm. Midfield-ah Kalvin Phillips leh DeclanRice te an awm a, tlarhmaah Harry Kane awmin Three Lions captain hi Phil Foden, Mason Mount leh Raheem Sterling ten an thlawp. Liverpool captain Jordan Henderson, Man United forward Marcus Rashford, Aston Villa star Jack Grealish te benchah an awm. Luka Modric-a'n Croatia a ho a, bul ṭantu zingah tawnhriat nei ṭha Mateo Kovacic, Ivan Perisic leh Marcelo Brozovic te an tel ve bawk.

A goal lo
England-in nung takin bul an ṭan a, Man City tana season ṭha tak hmangtu Phil Foden-a'n goal ban a pet per. Kum 21 mi Foden hian Euro 96-a England star Paul Gascoigne-a sam tih dan angin a rawn ti var a, a langsar hle. three Lions goal bawh a na nghal a, Kane leh Sterling te pawh an hlauhawm nghal. Midfield-ah Rice leh Kalvin Phillips te an nghet ṭha a, Foden, Mount leh Sterling te an hmuhnawm.

England-in ball an chang tam a, goal hmuh tur erawh a awm lawk lo. Amaherawhchu Croatia an rawn insiamrem a, England tlarhnung tan hna a awm. Kum 35 mi Modric-a'n theihna a la nei tih a pholang a, box pawn aṭanga a ball pet a goal teuh hle.

First half-ah goal a lut lo a, chutihrualin England an khel chhe lo. Tlarhnungah Maguire-a hmunruak Mings-a'n a hnawhkhat ṭha a, kum 28 mi Aston Villa defender a rintlak viau.

Sterling a goal
Wembley Stadium a nih miau avangin England-in ṭantu an nei ṭha a, second half-ah pawh an khel ṭha chhunzawm. Minute 56-naah Three Lions-in goal an khung ta a, goal khungtu chu Sterling a ni.

Midfield-a khel ṭha Leeds United midfielder Kalvin Phillips a ball ṭha bik pek chu Sterling-a'n goal-ah a chantir. Man City forward hi first half tawp chawhnu lamah dah ṭhatin a awm a, thlak theih dinhmuna a din laiin a pet goal.

England-in goal dang khung theihna tur an nei leh a, Mason Mount-a cross ṭha zet chu Harry Kane-a'n goal zawnah a pet thei lo. Tottenham Hotspur striker Kane-a'n beisei a pha lo a, English striker hi minute 82-naah Jude Bellingham-a'n a thlak.

Chelsea midfielder Mount erawh Champions League final ang thoin Euro 2020-ah pawh a hmuhnawm a, box pawn chiahah freekick hlawh chhuakin crossbar chung chiahah a pet. Southgate-a'n bench aṭangin Rashford leh Dominic Calvert-Lewin te a luhtir a, goal dang erawh a luh belh lo.

England - inchak an phua, chutihrualin World Cup fi nalist Croatiain beisei an pha lo a, Southgate-a naute tan harsatna an siam lo hrim hrim. three Lions erawh a vawi khat nan European Championship match hmasa berah hnehna an chang.

Euro-a player naupang ber
England midfi elder Jude Bellingham chuan minute 82-naah Harry Kane a thlak a, Borussia Dortmund midfi elder hi European Championship khel thei naupang ber a ni.

Bellingham hi kum 17 leh ni 349 mi a ni a, Euro 2012-a Netherlands wing back Jetro Willems (Kum 18 leh ni 71) record siam chu a khum.