Krejcikova kutah nomawi

Mumang ramah a cheng a, inelna neih zawh hnuah a harh chhuak chiah. Mi hriat hlawh ni nghai lo Barbora Krejcikova chuan Anastasia Pavlyuchenkova hnehin French Open 2021 nomawi a chawi.

Inrinni zan khan Paris khawpuia tennis stadium hmingthang Court Philippe-Chatrier-ah hmeichhe singles fi nal khelh niin, darkar khat leh minute 58 an inkhelh hnuah world number 31 Krejcikova hian 6-1, 2-6, 6-4 in hnehna a chang.

Chan loh khanah
French Open khelh ṭan a nih hma khan Krejcikova leh Pavlyuchenkova ten nomawi an inchuh ringtu an awm kher lo ang. Mahse, hliam leh thil dang vangin player langsar ṭhenkhat an inhukdawk a, ṭhenkhat an chak lo bawk.

Champion lai Iga Swiatek-i'n nomawi a hum leh mai dawn niin lang hman mah se quarterfinal-ah a tla a, mipui chan loh khanah player hriat hlawh lo pahnih an rawn lang nawlh a, an pahnih hian tun hmain Grand Slam fi nal an la khel ngai lo.

Major tournament fi nal a khelh hmasak berah a chak nghal a, nimin khan doubles huangah Czech Republic nula Katerina Siniakova nen inkawpin nomawi a chawi pui leh bawk; an khingpui Swiatek leh Bethanie Mattek-Sands te ṭangdun chu 6-4, 6-2 in an hneh. Roland Garros-ah hian Mary Pierce chuan kum 2000 khan singles leh doubles huangah hlawhtlinna a lo chang tawh a, ani hnuah chuan Krejcikova hi champion kawp leh thei hmasa ber a ni hial; a sulhnu hi sawi nep theih a ni lo.

Novotna a hre reng
Krejcikova hian tennis a ngaina a, naupan lai aṭangin a khel. Mahse, player dangte angin a tleirawl laiin a ṭha hluai lo a, a lar ve vut lem lo bawk. Kum 18 mi a nihin a nu leh pa chuan tun hma lama world number 2 lo ni tawh Jana Novotna kiangah an hruai.

Novotna hian thurawn a lo pe a, atan tennis zinkawnga mi pawimawh a ni chhunzawm. Novotna hi 2017 khan kum 49 mi chauh niin cancer vangin a thi a, a natna hi puang zar loin a pasal leh ṭhian hnaite chauh a hrilh; a thih hnuah erawh an puangzar.

Czech Republic nula Krejcikova chuan, "Jana khan tun dinhmun ka thlen theih nan hian hma min laksak, tunah hian van aṭangin ka hlawhtlinna hi min lo thlir ve ngei ka beisei, ka hnena a thusawi hnuhnung ber chu 'nuamti takin inkhel a, Grand Slam champion tum rawh,' tih a ni," a ti.

Krejcikova chuan sawi zawmin, "Ka lawmna hi thua sawi vek thei pawh a ni lo, ka duhthusam kha a takin a lo thleng dik. Player ṭha bikte chauhin an chawi tur nia ngaih French Open title chu ka kutah a awm ve ta mai hi a mak a ni," tiin a sawi.

-------
Mipa singles huangah champion lai Rafael Nadal chu semifi nal-ah Novak Djokovic hneh loin a tla, world number 1 hian nizan khan fi nal-ah Stefanos Tsitsipas a hmachhawn zui leh a, Serbian star leh Greek tlangval inkhel result hi kan hre hman lo.