Sweden hmachhawn turin Spain an inpeih
Covid-19 vangin Spain-in harsatna an tawk a, tunah erawh buaina zualpui a reh tawh. Zanin dar 12:30 hian Luis Enrique-a hoten Estadio de La Cartuja-ah Sweden an hmachhawn ang.
La Roja-in Covid-19 positive vangin Sergio Busquets an chhawr thei dawn lo a, Leeds defender Diego Llorente erawh positive anga tarlan a nih hnuah vawi li a negative leh tawh. Zirtawpni khan Llorente hian Spain training a zawm leh a, player dangin standing ovation an pe.
Spain tana thu lawmawm chu Busquets chiah a positive a, midang a kai darh lo. Barcelona midfielder thlak tur hian Enriquea'n Manchester City midfielder Rodri a nei a, Sweden lakah hian La Roja team ṭha kan hmu thei dawn.
Enrique-a'n huaisen takin player 26 koh theihah player 24 chiah a ko a, friendly match-a Portugal nen an inkhelh ṭum pawhin champion tur khawpin theihna an nei tih a lang. Amaherawhchu Covid-19 vangin an buai ta a, Lithuania nen friendly match an khelh ṭumah pawh Under 21 team-in an khelh a ṭul hial. Spain-in inven nan player 17 zet a hranin training a neihtir a, Euro 2020-ah 'B Team' inlan theiah an ding hman.
Tunah erawh Covid-19 vanga buaina zualpui a reh tawh. Enrique chuan, "Euro atan inpuahchahna duhthusam kan nei thei lo. Nitin PCR hmanga test ka nei a, rinhlelhna leh hlauhthawnnain kan khat a, a huhoin kan training thei lo. "Nilaini khan training kan ṭan leh a, mahse a ngai ang a ni tawh lo. Left back Jordi Alba leh Gaya te an awm dun thei lo a, 10 metre tala hlaah an awm a ngai. Chutiang bawkin position dang pawh a ni. Mahse chhuanlam siam kan tum lo a, champion tura rinkai paruk aṭanga pasarih emaw sawi se chuan kan tel ngei ang," tiin an dinhmun a sawi.
Spain team-ah Real Madrid player an awm lo a, ṭum dang angin an langsar lo. Amaherawhchu La Roja hian team angin an khel a, France coach Didier Deschamps duh loh Aymeric Laporte lawm takin an pawm a, Manchester City defender hi Spain ti ṭhatu a ni thei ang.
La Roja vanneihna chu an mual Seville-ah group stage match zawng zawng an khel dawn a, group E-ah hian Poland, Slovakia leh Sweden te an awm. Zanina Spain khingpui tur Sweden hi kumina match nga an khelh tawhah an la chak vek a, Enrique leh a hote tan fi ahna ṭha tak a ni thei ang.