Huaisen takin Djokovic a champion

A beidawng ve ngai lo a, a lal ram zauhna tur a nih chuan thih thlenga beih pawh a huam - Novak Novak Djokovic chu French Open 2021 champion a ni. Set hnih a hloh hmasak hnuah Stefanos Tsitsipas chu 6-7(6), 2-6, 6-3, 6-2, 6-4 in a hneh.

Serbian star hian Grand Slam nomawi 19 a chawi tling ta chiah a, a chungah hian vawi 20 champion tawh Roger Federer leh Rafael Nadal te chauh an awm, an pathum zingah kum lama naupang ber a nih avangin hmabak a nei êng hle.

Tun dinhmunah kum 34 mi Djokovic hian major title pali - Australian Open, French Open, Wimbledon leh US Open a kawl vek. Open Era (1968) hnu lamah chuan 'Career Grand Slam' thei awmchhun a ni a, hetiang dinhmun hi vawi hnih a chelhna a ni bawk!

Nghilh loh tur
Pathianni zan khan Court Philippe-Chatrier-ah French Open final hmuhnawm bik an khel. Champion lai Nadal hnehtu Djokovic-a'n Greek tlangval Tsitsipas lakah set hmasa pahnih a hloh hmasa, mahse darkar lo leh minute 11 an inkhelh hnuah a chak.

World number 1 Djokovic chuan, "Ka theihnghilh ngai tawh loh tur a ni, ka nunah leh tennis ka khelh chhunga hun pawimawh bik a ni a, French Open tawp lam darkar 48 hi ka dam chhungin ka hre reng tawh ang," a ti.

Harsa taka hnehna a chan hnuah Novak a sapatal lo, puitling takin a khingpui a chibai hmasa a, chumi hnuah inkhel entu lam hawia chak lawmin; a nupui Jelena leh coach Marian Vajda te nen chak an lawm chhunzawm.

Chak lo Tsitsipas tan pawh theihnghilh a har dawn, a kut lehlama nomawi a chelh tawh chu a thlauh leh nia ngaih a ni. A ṭhutna a pan a, beidawn hmel taka a ṭhut hnawk hnuah a hrukpuan (towel) in a hmai a khuh - atan a na takzet a, mahse siamṭhat theih a ni tawh si lo.

Naupang kha...
A champion hnuah Djokovic hian inkhel entu zinga naupang pakhat henah a 'racquet' a pe. Serbian hian amah thlawp tlattu naupang hi a tan a ṭangkai thu leh, inkhelh dan tur thlenga a lo sawi ve chu a hlawkpui thu a sawi.

Set hnih a hloh a, chak lo mai tur angin a lang hman. Hun harsa a tawh laiin naupang hian Djokovic a thlawp thu a lo au chhuahpui fo; a player ṭan tak mai hi a chak theih nan aw rawl a chhuah bakah a hriat ang angin inkhelh dan tur a lo hrilh.

Djokovic chuan, "Amah kha ka hriat ngai a ni lo, mahse inkhelh chhung zawng khan court sir aṭanga a thu lo sawi kha ka hre phak a, ka bengah a cham reng. A bik takin ka dinhmun a chhiat lai khan min lo au nasa zual hle bawk.

"I service hum la, ball hmasa kha harsa lo taka lain inkhel thunun tum rawh, chumi atan chuan backhand lama a vuak turin ball pe rawh, tiin min lo fuih ri kha ka hre reng. Amah ka va hmu a, naupang duhawm tak a lo ni a, racquet pek kha a phu," tiin a sawi.

Engkim a theih

Paris khawpuiah Nadal a hneh thei a, atan thil harsa leh huphurhawm a awm thei tawh chuang lo ang. Djokovic chuan mipa tennis player ten an la tih theih ngai loh 'Golden Slam' nih a tum; kum khat chhunga major title pali bakah Olympic gold medal lak a tum dawn tihna a ni.

Australian Open leh French Open nomawi a chawi a, tun thla tawpah Wimbledon an khel zui dawn. Nipui laiin Tokyo Olympic an hmachhawn ang a, season tawp lamah US Open an khel dawn bawk, hmabak erawh a la hautak dawn hle.

Djokovic chuan, "Mi tam takin ka tih theih loh tura an ngaih hi ka lo ti tawh ṭhin, tun dinhmunah pawh hian Golden Slam thei turin ka taksa chu a fit ṭha hle. Kan tuma kan beisei a nih chuan engkim mai hi theih loh a awm lo," a ti.

Hmeichhe player zingah chuan Steffi Graf-i'n 1988 khan 'Golden Slam' dinhmun hi a lo luah tawh, kumiminah Djokovic hian a hlen chhuak ve thei a nih ngat chuan a elpui dang Nadal leh Federer te tan nih ve theih loh tluk a ni tawh ang.

Nghah rih a la ngai
Athens khawpui daifem aṭanga rawn chawr chhuak Tsitsipas-a'n 2019 ATP Finals nomawi a chawi a, thla hmasa mai khan Monte Carlo Masters-ah a champion bawk, French Open semifinal a khelh dan thlir chuan champion tura rinkai a ni.

Mahse, Greek tlangval kum 22 mi chauh hi inkhel boruak sangah a ruh a la no deuh. Inkhel tir lama 'aces' a siam pup pup ang khan a chhawm nung thei lo a, set hnuhnung pahnihah phei chuan dawhtheihna a nei tlem zawk tih a lang bawk.

Tsitsipas chuan, "Ka inkhelh dan phung ṭha tak kha ka hloh tlat mai a, a pawi zo ta a ni. Theihtawp chhuahin inelna kan hmachhawn a, a hmawr bawk fuh lotu nih chu a hrehawm takzet," a ti, theihna a neih san avangin nomawi lian tham erawh a la chawi ngei a rinawm.

French Open bikah hian Djokovic pawh final a khelh hmasak pathumah a chak lo vek. Tunah erawh clay court inelna lianah vawi hnih a champion thei ta, Greek tlangval Tsitsipas tan pawh beiseina sang tak neih theih a ni ang.

Thil thlen dan...
• Ṭhum vawrah Tsitsipas a vannei zawk, a service hmasain a la chhunzawm nghal.
• Game 5 ve ve an lak hnuah Djokovic-a'n service a chhuhsak, set la turin a service zui.
• Tsitsipas-a'n a chhuhsak let a, 6-6 niin tie break an khel.
• Darkar khat leh minute kua zet an khelh hnuah Tsitsipas-a'n set khatna a la.
• Set hnihnaah Tsitsipas-a'n service a chhuhsak nghal.
• Greek tlangval in Game sarihnaah chhuhsak lehin a service a hum zui a, set hnihna a la.
• Djokovic-a'n set thumna a la a, set linaah pawh a khingpui service hmasa pahnih chhuhsakin a tlang.
• Set thumna an khelh zawhah Tsitsipas hnungzang nâ enkawl a ngai.
• Set hnuhnung berah Djokovic a buai lo, inrintawkna sang tak nen hatsatna tawk tawh loin a chak.