Ronaldo-a'n record thar a siam dawn em?

Cristiano Ronaldo telna Portugal team chuan zanin dar 9:30 hian Euro 2020-a an match hmasa ber an khel dawn a, Hungary an hmachhawn dawn.

Tun hnai international football-a titi luah ber pawl chu Ronaldo a ni a, "Portugal a champion pui thei ang em?" tih ai chuan, "Record thar a siam thei ang em?" tih chu zawhna awm a ni mek. Ronaldo hian Portugal tan match 175-a khelh tawhah goal 104 a khung tawh a, international football-a goal khung hnem ber Ali Daei tluk turin goal nga khung bak a mamawh tawh lo.

Juventus forward hian Euro-ah goal nga khunga Daei record-a nihrual chuan a ropuina belhchhahin a awm ang a, mi tam takin khawvela footballer piang tawh zinga ṭha ber ang hialin an chhal nawn leh ang.

Record chu
Kum 36 mi ni tawh mah se Ronaldo-a'n kuangkuaha ṭhut hahdam mai a la tum lo a, Portuguese forward tum ruh hian record siam a, a tam thei ang ber nomawi chawi zel tumin hun a la hmang sauh sauh.

Ronaldo-a'n goal 104-a khung tawh avangin international football la khel mek zingah ram tana goal khung hnem ber record a chelh mek a, ram tana la khel mek zingah UAE striker Ali Mabkhout (75 goals), Sunil Chhetri (74 goals) leh Lionel Messi (72 goals) te chu ram tana goal khung hnem dang an ni.

Real Madrid legend hian ram tan match khat zela goal 0.59 khung ang a ni a, international football-a a la tluk loh awmchhun Daei hian Iran tan match 149 khelin goal 109-a khung a, match khata goal 0.73 khung ang zel a ni thung.

Ronaldo-a'n mimal anga lawmman a dawn leh record-a siamte ziah lan sen a ni lo a, a elpui Messi a tlansan theihna remchang international-ah erawh a sang ber thlen a duh ang - Euro-ah goal nga a khung chuan a ropui dawn.

Ronaldo lo pawh!
European champion ni lai Portugal-in an chhuanvawr ber ni ṭhin chu Ronaldo a ni a, player dang ṭha tak an awm lo a nih pawhin Ronaldo a awm miau avangin Portuguese mipuite rilru a hahdam ṭhin.

Tun hnaiah Portuguese player-ten nasa takin hma an sawn a, Ronaldo chauh lo pawh chhuan tur an nei ve ta a, Juventus striker hi awm lo ta pawh ni se Portugal hi champion tura rinkai zingah an tel tho ang!

Portugal hian tlarhmaa chhawr tur ringawt pawhin season hman zawh taka Eintracht Frankfurt tana goal 29 khungtu André Silva, Valencia forward Gonçalo Guedes, Liverpool-a hming chher chho mek Diogo Jota leh Atletico Madrid forward 'hot' Joao Felix an nei mek.

Tlarhnungah tawnhriat nei ṭha Pepe hoin Premier League-a Manchester City champion puitu Rúben Dias-te an awm a, midfield-ah lah Bruno Fernandes leh Joao Moutinho-te ho an awm avangin an ngaihtuahawm loh.

Cancelo OUT!
Portugal-in squad an nei chhah a, Euro-a an match hmasa ber an khelh ṭan hma hauh aṭangin chanchin lawmawm lo an nei thung. Right back pawimawh João Cancelo chuan Covid-19 a kai.

Manchester City defender hi squad aṭangin paih a ni zui a, a hmun ruak luah tur hian AC Milan lama loan-a khel mek Diogo Dalot chu koh a ni.

Kum 22 mi Dalot hi Manchester United player a ni a, Red Devils-ah beisei phak lo mah se AC Milan-ah season hmasa khan loan-in a khel a, match 33 a khel - Portugal ram ni lo se, squad indaih loh vang chauh ni loa khelh phakna tur Euro 2020-ah a nei nual.

Cancelo paih a nih laia Dalot koh nghal theih hi Portugal ṭhatzia pholanna a ni a, zaninah team tenaua ngaih Hungary lakah point thum aia tlema lungawi an tum lo ang.

Hungary bihchianna
Group of death-ah Hungary-in Germany, France leh Portugal an awmpui a, an vanduai takzet - mahse, he team hian an mual Ferenc Puskás Stadium-ah an khelh dawn avangin thai bo nghal an duh bik kher lo ang.

Hungary hian an rawlthar ṭhangduang Dominik Szoboszlai chu hliam vangin Euro-ah an hruai thei lo a, mahse, Mainz 05 forward tawnhriat nei ṭha Ádám Szalai leh Freiburg winger Roland Sallai-te ho tlarhma nawr turin an nei a, Portugal barakhaih thei tur 'quality' chu an nei.

Tlarhnung lamah RB Leipzig centre back Willi Orbán leh Fenerbahce centre back Attila Szalai-te ho an awm a, Ronaldo leh a ṭhiante dang turin an ṭha tawk ang em, tih chu a hriat thuai dawn.

Hungary hian inelna hrang hranga match an khelh hnuhnung 11-ah tlawm an nei miah lo a, an hneh zingah hian Turkey, Bulgaria, Serbia leh Iceland te an tel a, hei chauh hi a ni lo an ram khawpui Budapest-ah an inkhelh dawn avangin inrintawkna sang tak nen Portugal an hmachhawn ang.