Nuggets lakah Phoenix Suns an hrang

Phoenix Suns chuan nimin zing khan Denver Nuggets lakah 125-118 in hnehna an chang a, NBA Western Conference semifinal series chu 4-0 in an la; Suns hian tun hnai kum 11 chhunga a vawi khat nan conference final an lut.

Suns tan Chris Paul chuan point 37 zet a nei a, ani bakah hian Devin Booker-a'n point 34 neiin rebound vawi 11 a la bawk a, hnehna an chan theih nan player pahnih hian an thawh hlawk takzet.

Inkhel tawp lamah Nikola Jokic chu Cameron Payne laka a chetdan mawi lo vangin hnawhchhuah (eject) a ni. NBA Most Valuable Player (MVP) ni hlim hi Suns player Booker nen an intibuai zui a, player ten an ṭhelh a ngai hial.

Suns hian 2009-10 season hnua a vawi khat nan conference final an khel dawn a, Utah Jazz leh Los Angeles Clippers inkhela a chak zawk an hmachhawn ang. Seeded pakhatna Jazz hian series-ah 2-1 in hma an hruai mek.

Phoenix Suns coach Monty Williams chuan, "Tun ang hun thleng tur hian hun rei tak chhung kan nghak tawh. Player leh coaching staff kan hlim a, club hmangaihtu fan-te lawmna san turzia erawh kan suangtuah pui phak lo hial.

"Team dangte angin mi ropui tak tak awmkhawm kan ni ve kher lo a ni thei. Mahse keini chuan basketball hi mimal chauha khelh a nih lohzia a takin kan lantir. Chutih rualin kan tana Chris Paul pawimawhna erawh sawi nep theih a ni lo," a ti.

Nimin zing inkhel dangah Milwaukee Bucks chuan Brooklyn Nets lakah 107-96 in hnehna an chang. Eastern Conference semifinal game hmasa pahnihah Nets an chak a, nuamsa taka tlang tur angin lang hman mah se tunah chuan a zawnin Bucks an chak ve leh ta.

Bucks thiampuipa Giannis Antetokounmpo-a'n point 34 a neih bakah rebound vawi 12 a la, playoff china point a neih hnem ber ṭum a nihrual. Nets lamin hliam vangin an player pawimawh Kyrie Irving an chhawr thei lo thung.

Nets hian Irving bakah James Harden chu hliam vang bawkin an la chhawr thei lo - player ṭha Kevin Durant-a'n point 28 nei mah se amah thlawptu a neih ṭhat miau loh avangin hnehna chan nan a tawk zo lo.

June 16, Nilaini zing dar 6:00 hian game 5 an khel leh ang.