Venezuela tan Brazil an thiam mah mah

Copa America champion lai Brazil chuan an nomawi humhim ngei an tum. Pathianni zan khan an group match hmasa ber khelin, an thiamna tinreng hmanga inkhel thunun chungin Venezuela chu 3-0 in an sawp.

Brazil tan Marquinhos-a'n goal hmahruai khungin Neymar chuan penalty a chhuih lut a. Paris St-Germain forward hian Gabriel Barbosa khung tur siamsak bawkin nuamsa takin hnehna an chang.

Nimin zing inkhel dangah Colombia chuan Edwin Cardona-a goal khat hmangin Ecuador chu 1-0 in an hneh ve bawk. Group B team zinga mi Peru chuan June 18 zingah an match hmasa ber atan Brazil an hmachhawn dawn a ni.

Buaina karah
Covid-19 vangin Agrentina leh Colombia ten inelna an thleng thei lo a, hnawhsarum takin Brazil kutah a tla. June 11, Zirtawpni khan Venezuela hian inelna neihna tur hmun an thleng ve chauh.

Venezuela team aṭangin player leh coaching staff zingah mi 12 zetin hri leng an kai tih hmuhchhuah an ni a, player thar pariat an ko chawp. South American Football Confederation (Conmebol) duh dan angin inelna an hmachhawn zui nghal.

Mane Garrincha Stadium, Brasilia-a inkhelah Venezuela tan beisei tur a awm lo tih theih a ni. Tite nauten kawng tinrengin inkhel an thunun a, minute 23-naah corner aṭang ball lo kal an pet chhuah mai theih loh avangin Marquinhos-a'n hnai tak aṭangin a khung.

Neymar-a'n a ball thiamna hmangin Venezuela tlarhnung a chhaih buai hneh hle a, goal erawh an nei chhunzawm thei mai bik lo. Minute 64-naah Danilo chuan penalty a hlawh chhuak a, a pet tura rawn ding chhuak Neymar tan harsatna a awm lo.

Brazil tana goal 67 khung tawhtu Neymar hi hun tawp dawnah a tal put leh a, keeper Joel Graterol thlenga a paltlang hnuah Barbosa tan a siamsak. Neymar hian ram tana goal khung tam lamah Pele chu goal 10 chauhin a phak lo ta, kum 29 mi chauh a la nih avangin a khum a rinawm.

Champion nawn tum
World Cup qualifier an khel chauh a, Copa America atan inbuatsaihna a awm ṭha tawk lo bawk. Hri leng vanga an rilru a buai bawk avangin Brazil hi an inpeih hman lo nia sawi a ni, match hmasa berah erawh Tite naute an ṭha tawk hle.

Brazil captain Casemiro chuan, "Friendly, Copa America leh World Cup qualifier pawh nise kan ram hi chuan chak vek kan duh. Venezuela khan point khat tal hmuh tumin tlarhnung an veng ṭha hle a, mahse keini lamin kan tih tur ang tak kan ti thei," tiin a sawi.

Tite-a'n tun inelna chauh ni loin nakkuma neih tur World Cup a thlir a, team nghet leh rintlak tak a din tawh. Tite chuan, "Player tlan dan tur leh team khelh dan phung kan ruahman pawh a hlawhtling thawkhat tawh hle," a ti.

Venezuela coach Jose Peseiro chuan, "Chawpchilh takin harsatna kan tawk a, boruak rit takin min delh mah se kan khel ṭha ka ti. Player-te rilru a thlamuang lo a, mahse kan ram aiawh kan nih bakah Copa America kha a lo thlawna luan liam tir kan duh lo," tiin a sawi ve bawk.

June 17, Ningani zan dar 2:30-ah Venezuela hian Colombia an hmachhawn leh dawn a, group pakhata team panga awm zinga pali ten quarterfinal an luh dawn avangin Peseiro naute tan knockout round beiseina a la awm.