Barcelona-in June 13-ah league match khel dawn

Spanish La Liga chuan June 11-a season an khelh chhunzawm leh theih tur thu an sawi hnuah fixture an ti chhuak a, champion lai Barcelona chuan June 13 zan dar 1:30-ah Mallorca an hmachhawn nghal dawn. 

Covid-19 vanga inkhelh chawlhsan a nih hnua La Liga match hmasa ber chu June 11 zanah khelh a ni dawn a, zan dar 1:30-ah Sevilla chuan Real Betis an mikhual dawn - Seville derby hmangin bul ṭan a ni dawn tihna a ni. 

Barcelona hnuaia awm Real Madrid chuan June 14 zan dar 11:00-ah an league match an khel ṭan ve leh dawn bawk a, Eibar an mikhual ang. Match 27 khelh tawhah Real hian point hnihin hmahruaitu Barcelona an phak lo mek. 

La Liga chief Javier Tebas chuan July 19-ah league khelh zawh an tum thu a lo sawi tawh a, Spanish club-te hian an ruahman anga zo tur chuan nitin league match an neih a ngai ang. 

European top flight league zingah Bundesliga chuan May khan league an khelh chhunzawm leh tawh a, Premier League chuan June 17-ah league an khelh chhunzawm tur thu sawiin Serie A chu June 20-ah khelh chhunzawm leh tum a ni bawk.