Zanin dar 12:30-ah France Vs Germany
European Championship 2020 group stage-a inkhel en châkawm ber thur chhuah ngai ta se, zanin dar 12:30-a France leh Germany inkhel thlangtu hi an tam khawp ang.
Football ngainatute tan hmaih phal chi a ni lo a, zanin hi men rei zan an tih ngei chu a ni. Amaherawhchu Mizoram chhunga Covid-19 hri leng a la reh loh avangin ṭhianho a inkhel en khawm a la rem lo a, kan him tlan nan mahni in ṭheuha en hi kan tih makmawh a ni.
Champion rinkai
Euro 2020-a champion rinkai ber chu France an ni a, goalkeeper aṭanga striker thlengin an ṭha vek. Didier Deschamps-a'n squad tana a koh duh loh Aymeric Laporte pawh Spain-ah rinrawl a ni pha a, hei hian Les Bleus dinhmun a sawifiah ṭha hle.
France hi record en pawhin an ṭha a, Euro 2016-ah pawh final lutin Portugal lakah an vanduai. FIFA World Cup 2018-ah erawh an vanduai nawn lo a, Deschamps-a hoin nomawi an chawi. Tun ṭuma kan hmuh tur Les Bleus hi World Cup hnuhnung ber ai khan an la ṭha thei bawk.
An ṭha e
France leh Germany player-te hi buk ta ila, goalkeeper Hugo Lloris aiin Manuel Neuer ṭha ti zawktu an tam a rinawm. Position dangah erawh Les Bleus player-te thlangtu an tam zawk ang.
Chutihrulain Lloris hi dah hniam chi an ni lo a, kum 34 mi keeper hian France tan match 125 a khel tawh a, a tawnhriat ringawt pawh hi chhuan tham a tling. Defence laiah Raphael Varane (K-28) leh Presnel Kimpembe (K-25) te an awm a, hmabak a nei eng dun hle. Mual sira awm turin Bayern defender Lucas Hernandez leh Benjamin Pavard te an awm.
France tlarhnung an ṭha a, an hmaa ding turin N'Golo Kante a awm. Defensive midfielder ni chung siin Kante hian ballon d'Or dawn a phu titu lah an tam. French midfielder hian World Cup nomawi, Champions League leh Europa League bakah Premier League thlengin a champion tawh a, a hmabak chu Euro hi a ni.
Kante bula ding tur hian Paul Pobga a awm a, Adrien Rabiot leh Corentin Tolisso te inkarah bul ṭan tur zawk hriatthiam a har. Rabiot aiin Allianz Arena hrechiangtu Bayern midfielder Tolisso-a'n bul a ṭan thei bawk. Manchester United midfielder Pogba ringawt pawh hi ha hipa sawi tham a ni.
Three Musketeers
Karim Benzema leh Antoine Griezmann te hliam tenau a dam hman a, Germany nen an inlan thei ang. Benzema, Griezmann leh Kylian Mbappe te pathum hi 'Three Musketeers' hming lem an pe a, France tlarhma pathum hi an ṭha. Bench-a awm Olivier Giroud, Ousmane Dembele, Wissam Ben Yedder leh Marcus Thuram te pawh hi player ṭha tak vek an ni.
Deschamps-a'n kum nga leh a chanve hnuah Benzema a ko let a, Real Madrid striker hi friendly match-ah beisei pha lo mah se inelna takah a rintlak ang. Season hman zawh takah khan Benzema (Real - 30 goals), Mbappe (PSG - 42) leh Griezmann (Barca - 20) te goal khung zat belh khawm chu goal 92 a ni a, a chhuan tham hle.
Chutihrualin player pathum hi an khel tam tawk lo a, hei pawh hi buaina tur a awmin a lang lo. Benzema chuan, "Player ṭha chu vawi 100 chuang khelh dun a ngai lo. Theihna sang tak an neih vek avangin khelhho a awlsam," tiin a sawi.
Benzema a awm takah chuan France khelh dan a dang dawn. World Cup-a an champion ṭum kha chuan hma tawngah Olivier Giroud a awm a, goal khung lo mah se Chelsea striker hi a ṭangkai hle.
Mbappe chuan, "Giroud kha chu a tactical zawk. Benzema chuan a sira chet sawn nuam a ti a, ding lem vei aṭanga chance insiam a duh ṭhin," tiin an khelh dan a dang tur thu a sawi a, France tlarhma pathum hian goal khung tur leh defence ṭhiat turin an position an inthlak kual tam ang.