Germany an ṭha tawh lo?

Joachim Low hnuaiah Germany-in Euro vawi thum an khel tawh a, semifinal tal an thleng vek. Kum 2008 khan final an thleng a, nomawi inchuhnaah Spain an hneh lo.

Germany hian kumin Euro zawh hian coach ropui Low hi an thlah dawn a, 2014 World Cup hian ṭha taka thlah a phu. Die Mannschaft captain Manuel Neuer chuan, "Low tan kan khel ang," tiin a sawi.

Amaherawhchu Germany hi group of death-ah an awm a, world champion France nen bul an ṭan zawhah European champion Portugal an hmachhawn lehnghal dawn. Group match hnuhnung berah Hungary an khel dawn chauh a, champion ve thei ni bawk mah se an fixtures en hian tla thei an ni.

Germany chu
Germany-in group match hi an mual Allianz Arena-ah an khel dawn a, Bayern player pariat zet an kawl a, team tan ṭhatpui tham a ni. Amaherawhchu Bavarians player zingah pali emaw panga emaw bakin bul an ṭan a rinawm loh.

Neuer hi chu a dam ṭha a nih phawt chuan a khel dawn a, Lammuala inkhel tawh Niklas Sule erawh bul ṭan tur khawpin a ṭha tawk lo. Champions League nomawi chawi hlim Antonio Rudiger, Mats Hummels leh Matthias Ginter ten bul an ṭan a rinawm zawk.

Friendly match aṭanga an khelh dan thlirin mual sira awm turin midfielder Joshua Kimmich tlukpha an awm lo a, Germany-in midfielder an neih ṭhat tho avangin Kimmich hi right wing back-ah a awm a rinawm. Atalanta wing back Robin Gosens hi ram tan la khel tam lo mah se bul a ṭan a rinawm bawk.

Midfield-ah Toni Kroos leh Ilkay Gundogan te an awm a, tlarhmaah Kai Havertz, Thomas Muller leh Serge Gnabry te an luh a rinawm. Bench aṭanga lut turin Leroy Sane, Timo Werner leh Florian Neuhaus te an awm a, squad a chhah ṭha hle.

Muller a telna
World Cup 2018 zawhah Low-a'n thutlukna maksak tak a siam a, Muller, Hummels leh Jerome Boateng te a koh tawh loh tur thu a puang. Germany coach hian player naupang zawk te a hmang kual a, a tawpah erawh Muller a hmunruak a hnawh khat thei lo tih a hre chhuak.

Bayern Munich-ah pawh Muller-a aia player dang thlangtu coach Carlo Ancelotti leh Niko Kovac an awm a, an hlawhtling lo ve ve. Chutihrualin Muller duhsaktu coach Hansi Flick leh Jupp Heynckes te chu an treble champion ve ve.

Muller hi a theihna thlirin James Rodriguez leh Philippe Coutinho te aia coach ṭhenkhatin an hmu hniam hi a mak lo. Amaherawhchu Muller erawh Germany leh Bayern tan chuan a special a, team tana a theihna zawng zawng hlantu a nihna tak hi player dangin an tluk lohna a ni.

Team tana khel ṭhin Muller hian a khelhna position 'Raumdeuter' tihin a sawi a, chumi awmzia chu 'hmun awl siamtu' tihna a ni. France nen pawh hian Muller hi a ṭangkai leh dawn a, team tan a theihna zawng zawng a hlan leh dawn. Inkhelhna tur hmun hi Allianz Arena a nih bawk avangin Muller leh a ṭhiante hi France hmaah zamna an nei lo ang.

Khel tura beiseite
France: Lloris; Pavard, Varane, Kimpembe, Hernandez; Kante, Pogba, Rabiot, Griezmann; Benzema, Mbappe

Germany: Neuer; Ginter, Hummels, Rudiger; Kimmich, Gundogan, Kroos, Gosens; Havertz, Muller, Gnabry