Hnehna chan vangin Southgate a lawm

Major tournament-a awm apianga thawm na pawl ni ve thei reng England chuan Pathianni zan khan Euro 2020-a an match hmasa ber an khel a, World Cup 2018 semifinal aṭanga pet chhuaktu Croatia chu 1-0 in an hneh.

Three Lions tan Raheem Sterling chuan inkhela goal awmchhun hi a khung a, he goal hi khel ṭha em em mai, Leeds United midfielder Kalvin Phillips-a siamsak a ni.

England boss Gareth Southgate chuan, "Match hmasa bera hnehna chan loh chuan pressure a tam em em duh ṭhin a ni. Chutihrual chuan match harsa tak pahnihin min la hmuak tih hriat tel a ṭha.

"Zaninah chuan kan hna kan hlen a, mahse, last 16 lut tur hian tih tur pawimawh tak tak a la awm a ni," a ti a, match hmasa bera Croatia hneh avanga hahdam mai lo turin a naute a chah.

English boss chuan sawizawmin, "Kan khelh dan khan minti lawm ber mai. Ni a sain khua a lum em em a, kan match lah a pawimawh em em bawk. Mahse, chutiang karah chuan ka player-te an talbuai lo a, Croatia kha chance nei ve lo turin kan dang chat reng thei a ni," a ti.

Euro thlengtu khawpui 11 zingah London a tel a, England-in hei hi vanneih phahin Wembley Stadium-ah an group match thum chu an khel vek dawn - Croatia nen an inkhelh zanah pawh an thawm a ṭha hle.

Southgate chuan, "English mipui tan chuan vawiin hi ni duhawm tak a ni," tiin a sawi a, fans lam hawia lawmthu a sawiin kum 50 mi coach hian lawm a hlawh takzet.

Kum 50 mi Southgate hian inkhelah thutlukna siam mak tak tak a nei nual a, chung zingah chuan right back-a khel tura Atletico Madrid left back Kieran Trippier-a thlan chu a tel.

Southgate hian Manchester United defender Luke Shaw pawh nei mah se a luhtir lo a, Champions League-a Chelsea champion puitu Ben Chilwell chu squad-ah pawh telh a ni lo.

Player-a nih laia England tana vawi 57 lo inlan tawh Southgate chuan a thutlukna sawifiahin, "Tlarhnung lamah a ṭhiante pui tura a au reng thei leh a ṭawng thei hi a pawimawh a, chumi piahlama a tlanchhuah theihna leh cross-a lo dan theihna pawh hi kan hre reng.

"Tlarhnunga bul ṭan zinga mi Tyrone Mings khan a international career-ah tawnhriat a la nei tlem em em bawk si a, Trippier-a lut tel khan kawng tam takah a puih theih kan rin vang a ni bawk," tiin a thutlukna a sawifiah.

Fans thlawpna ṭha tak nena inkhel England hian June 18 zanah match an khel lehnghal dawn a, nizana Czech Republic nena inkhel Scotland nen an inhmachhawn ang.