Inkhel hmuhnawmah Netherlands an chak
Netherlands leh Ukraine inkhelah goal nga ngawt a lut a, Frank de Boer hoten 3-2 in hnehna an chang.
Johan Cruyff Arena, Amsterdam-ah Netherlands-in Georgino Wijnaldum leh Wout Weghorst te goal hmangin 2-0 in hma hruai mah se Ukraine-in Andriy Yarmolenko leh Roman Yaremchukte hmangin an sut.
Oranje ṭantute an ngawi a, chak lo thei dinhmuna an din tak avangin an hlauthawng. Minute 85-naah Denzel Dumfries-a'n ṭha zetin an rawn tauh goal a, Netherlands-in point thum hlu tak an hlawh chhuak.
De Boer a ni tlat!
Netherlands-in Ronald Koeman hoin result ṭha tak an nei a, Nations League final lutin Euro-ah pawh beisei an nei sang hle. Koeman-a ho hian 2014 World Cup hnuah inelna lian hmachhawn turin Euro 2020-ah an tling.
Amaherawhchu Koeman-a'n nikum August khan Barcelona a pan ta daih. Netherlands-in Inter Milan, Crystal Palace leh Atlanta United ten an ban Frank de Boer an ruai a, Oranje manager zinga match hmasa palia chak hmel hmu lo hmasa ber a ni.
Netherlands hian result an neih ṭhat loh chuan De Boer hi ban thei dinhmunah a ding. Chutichung chuan De Boer hian huaisen takin a ngaihdan a kaltlangpui a, mipui lamin 4-3-3 formation duh mah se 3-5-2 formation a hmang tlang.
A hmuhnawm
First half-ah goal a lut lo chungin inkhel hmuhnawm a ni a, Netherlands-in goal khungna chance ṭha an ngah. Memphis Depay, Wout Weghorst, Denzel Dumfries leh Georginio Wijnaldum ten goal khung theihna tur an nei vek a, Ukraine keeper Heorhiy Bushchan a chet ṭhat zan a ni tlat.
Andriy Shevchenko kaihhruai Ukraine pawhin counter attack hmangin Netherlands tlarhnung an tibuai a, Andriy Yarmolenko goal khung tur chu Maarten Stekelenburg-a'n a dansak. Oranje hian inkhel thunun mah se Virgil van Dijk leh Matthijs de Ligt te awm lohna tlarhnung hi a phui tawk lo.
A goal ta
Second half-ah inkhel a hmuhnawm chhunzawm a, goal a tel bawk. Dutch captain Wijnaldum-a'n minute 52-naah goal hma hruai a khung a, minute 59-naah Weghorst-a'n a khung belh. Oranje nuam sa taka chak turah ngaih theih a, De Boer-a'n defence pahnih ngawt a thlak.
Amaherawchhu Yarmolenko-a'n ngaihdan dang a nei a, minute 75-naah mawi zetin a khung. Ukraine an che ṭha zui a, minute 79-naah Yaremchuk-a'n a tauh goal leh a, 2-2 a ni der. Inkhel boruak a sang a, minute 85-naah Ake-a cross ball chu Dumfries-a'n a tauh lut a, a tawpah Netherlands 3-2 in an chak hram.
Netherlands-in Austria an hmachhawn leh dawn a, De Boer-a'n tlarhnung a thuam ṭhat a ṭul dawn. Ukraine lakah Oranje tlarhnung a nghing nasa a, De Ligt a dam vat a pawimawh ang.
Goal hnih kan chhuah hnua an khelh dan avangin ka player-te chungah lawmthu ka sawi duh. Inkhel nung ṭha tak a ni a, team pahnihin goal chance kan ngah hle. - Andriy Shevchenko, Ukraine coach
Ukraine hi team ṭha an ni tih kan hria a, counter attack hmangin chance ṭha tak an insiam thei a ni. Kan khingpuiten chance ṭha an neih loh nan tuna aia kan van ṭhat kha a pawimawh ang. - Frank de Boer, Netherlands coach
Goal ka khung chhan kha chu rinna kan neih vang a ni. Goal khungna chance kha a awm ka ring tlat a, chumi hun atan chuan kan inpeih reng a ṭul. - Denzel Dumfries, Netherlands chakna goal khungtu