Austria hmaah North Macedonia beiseina a thamral

Euro 2020-a group stage match ngaihven hlawh lo pawl, mahse, hmuhnawm pawl ni siah Pathianni zan khan Austria-in North Macedonia an hneh a, National Arena, Romania-a inkhelah Austria hian 3-1 in hnehna an chang.

Austria-in major tourna-ment-ah a vawi khat nan hnehna an chang ve ta a, North Macedonia-in major tournament-a an match hmasa ber an khel thung - result erawh an beisei ang a ni zui lo.

Team ṭha zawk Austria tana Stefan Lainer-a goal hmahruai khung chu North Macedonia-in an thiampuipa Goran Pandev hmangin an chhanglet a, mahse, Austria hian Marko Arnautovic leh Michael Gregoritsch hmanga khung ve lehin a tawpah 3-1 in an chak.

Austria hian Ningani zan dar 12:30-ah Ukraine hneh hlim Netherlands an hmachhawn leh ang a, Ningani zan dar 6:30-ah North Macedonia-in Ukraine an hmachhawn dawn bawk.

Austria beiseina
Team pahnih squad enin Austria chu chak tur zawka beisei an ni a, chutihrual chuan North Macedonia hian April 1 khan World Cup qualifier-ah Germany chu 2-1 in an hneh a, inrintawkna an neih san vanglai tak a ni.

Beisei angin Austria lamin an nawr thei bik lo a, North Macedonia lamin an tih tur chin an hriatchian avangin Austria tan ram tenau zawka ngaih hi pawngtawng nawr chiam a harsa hle.

Mahse, minute 18-naah Austria vanneihna a her chhuak hram a, khel ṭha tak Marcel Sabitzer-a ball cross chu Borussia Monchengladbach right back Lainer chuan tlan lut chungin a volley goal a, North Macedonia defender inthlahdah zeuh a lang a, Austria-in hma an hruai.

Lainer-a'n, "Chak takin awm rawh, Eriksen," tih inziak chuanna jersey a pholang zui a, a goal khung chu Finland leh Denmark inkhelh ṭuma nikhaw hre loa tlu, harh chhuak leh tawh Christian Eriksen tan a hlan.

Pandev a tar lo
Austria-in goal an khung hi chuan chak mai tura ngaihna a lian tawh a, team nem zawk North Macedonia tan si phurh sut a harsa tawhin a rinawm - mahse, Euro khel zinga FIFA ranking hniam ber (62) ram hian ngaihdan dang an nei thung.

Goal an khung aṭanga minute 10 hnu lawkah Austria an talbuai a, an tlarhnung tihsual nangchingtu Pandev-a'n a tawnhriat neih ṭhat chhawr ṭangkaiin, chiai miah loin si phurh sutna goal-a khung a, thawm chu ring tak a ni.

Pandev hi goal-a khung hian kum 37 leh ni 321 mi a ni a, North Macedonia Captain hi Euro-a goal khung thei upa pahnihna a ni - kum 38 leh ni 257 mi ni chunga Austria tana Poland (2008) laka khungtu Ivica Vastic chiah a tluk lo.

Serie A club Genoa striker hian ram tan match 120-a khelha goal 38-a khungna chiah a ni a, major tournament-a North Macedonia goal hmasa ber a khung hi a inhmeh hliah hliah hle.

Austria danglamna
North Macedonia-in an si phurh an sut hnuah Austria an ngam sawt a, a tira point khat mitthla chunga inkhel tura ngaih team khan an 'fight' ngam a, chak an tum ngam tlat tawh. Goal dang a lut lawk lo a, chawlhlawk hman hnu pawhin thawnthu a danglam lo - Macedonia lamin Austria an zuam thar!

Austria coach Franco Foda-a'n inkhel thlak danglam turin substitution siam a ngai tih a hmu thiam nghal a, minute 58-naah Gregoritsch leh Arnautovic a luhtir a, player pahnih an luh hnuah Austria goal nawr a na sawt - centre back-a dintir Alaba chu 'free role' pek a ni bawk a, game thlak danglam tumin a chhuak tam hle.

Minute 78-naah Gregoritsch chuan Austria tan an hmahruai vawi hnih nan goal-a khung ta nge nge a, a goal khung hi Eriksen tan a hlan ve bawk. Bundesliga club Augsburg forward goal khung hi Alaba siamsak a ni a, a tlanchhuak tamin awmiza a neihzia a lang.

Hun tawp nan minute khat chauh a awm tawh tihah Chinese Super League lama pem ta Arnautovic chuan a thiam a la theihnghilh lo tih a pholang ve zui a, chak nemnghehna goal-a khung - hun a tawp a, a tawpah team ṭha zawk Austria an chak. Group C-a team pahnih dang hi Netherlands leh Ukraine an nih avangin North Macedonia tan chuan last 16 lut tur chuan beih fe a ngai tawh ang.