India tan point hlawhchhuah a tawk
Euro khelh boruak vanglaiin Indian football team pawh zaninah an inlan ve leh dawn a, ṭhenawm ram Afghanistan nen World Cup qualifier-ah an inhmachhawn ang.
India-in World Cup qualifier khelh chhunzawm turin beisei an nei tawh lo a, mahse, Blue Tigers hian khelh chhan nei tawh lo tawp erawh an ni lo.
Igor Stimac-a naute hian zaninah point an hlawh chhuak a nih chuan AFC Asian Cup 2023 qualifier chu third round aṭangin an khel thei dawn a, beisei a la awm.
Inelna kalphung
2022 FIFA World Cup qualification (AFC) inelnaah team 46-in inelna an hmachhawn a, AFC ranking-a 35-46 na (12) ten first round aṭangin inelna an hmachhawn a, home & away-a khelh a nih hnuah a chak zawk ṭheuhin second round an lut.
Team parukte hian second round-a team 34 awm sa chu an zawm a, group pariatah (A-H) ṭhen hran niin, group pakhatah team panga zel an awm a, group tina a sang ber zel chu World Cup qualifier third round khel turin an tling - pahnihna zinga a ti ṭha zual paliin an zawm bawk ang.
Third round-a tling team 12-te chu group pahnihah, team paruk ve ve awmin ṭhen an ni a, an inkhelh kual vek hnuah group pahniha a sang pahnih chu World Cup khel turin an tling.
Group pahniha pathumna ve ve chu playoff-ah an intawng leh a, 'single leg' inkhela chak zawk chuan inter-confederation playoff hmangin World Cup khelh beiseina an la nei leh thei a ni.
Asian Cup
Asia khawmualpuia football thuneitu sang ber Asian Football Confederation chuan World Cup qualifier hi AFC Asian Cup 2023 khel tur zawnna remchangah a hmang tel nghal.
Group tina pakhatna hi Asian Cup khel turin an tling chiang nghal a, pahnihna zinga a ti ṭha zual pali chu Asian Cup khel tur hian an tling ve bawk - pahnihna ti ṭha pali zinga tel phak pahnihna ni ve tho team pali chuan Asian Cup qualifier chu third round aṭangin an khel nghal.
Asian Cup qualifying third round-ah hian group tina pathumna chu an lut nghal bawk a, hei hi India-in a beisei chu a ni - Afghanistan an inhnehtawkpui chuan pathumna an ni chiang ang a, Asian Cup qualifier hi third round aṭangin an khel ṭan thei ang.
Group tina palina zinga a ti ṭha zual pali chuan Asian Cup qualifier hi third round aṭangin an khel dawn bawk a, India hi tlawm ta pawh ni se point ruk lai an neih tawh sa avangin pangana Bangladesh (2 points) in an um pha thei tawh lo a, Asian Cup qualifying third round khel turin an tlin ngei hmel.
Qatar & China
Group tina pangana ṭheuhte tan erawh beisei tur a vang a, Asian Cup qualifying chu palina zinga a tichhe zual palite nen playoff round aṭangin an khel ṭan ang - playoff round aṭangin India hian qualifier an khel a nih ngat chuan mualphona tawpkhawk a ni ang.
World Cup 2022 chu Qatar-in an thleng dawn a, inelna thlengtu an nih avangin qualifier khel ve tho mah se tling chiang sa an ni - group E-ah an match khelh tur an khel zo tawh a, hmahruaitu an ni chiang tawh.
Qatar pakhatna ni vanneihpuitu chu pahnihna zinga a ti ṭha pangana an ni dawn a, Qatar aiah anni hi World Cup qualifying third round khel turin an tling ang a, Asian Cup khel turin tlin theihna remchang an nei tel bawk.
China hian Asian Cup 2023 a thleng dawn a, he inelna thlengtu a nih avang hian Asian Cup khel turin a tling sa a, China hian qualifier kaltlanga Asian Cup hmun ruak a han nei pha a nih chuan China aiah pahnihna zinga a ti ṭha pangana bawk an lut ang.
Mizo telna
India squad-ah hian Lunglei tlangval Lallianzuala Chhangte leh Vaivakawn rawlthar Lalengmawia (Apuia) te an awm a, Stimac-a'n a duh chuan a chhawr thei ang.
Covid-19 avangin group E-a match khelh tur la awm zawng zawng chu Qatar-in a thleng vek a, match thum hmabak nei chungin India an zin - an match hmasa berah Qatar chu 1-0 in an ngam lo a, match hnihnaah Bangladesh chu 2-0 in an hneh thung.
Qatar lakah bench aṭangin Apuia luhtir a ni a, Bangladesh lakah erawh Mizo footballer pahnih an inlan lo ve ve - zanin dar 7:30-ah Afghanistan an hmachhawn dawn leh dawn loh a chiang thei rih lo.
Sunil Chhetri bawk chu mit fukna a ni leh dawn a, India tan match 117-a khelha goal 74 khungtu hian ram tana la inkhel mek zingah Cristiano Ronaldo (104 goals) leh Ali Mabkhout (75) chiah a tluk lo - UAE striker Mabkhout hi Bangladesh laka goal hnih a khung khan a pel hman a, mahse, June 11 zan khan Mabkhout hian 5-0 a Indonesia an hnehna inkhelah goal hnih a khung ve leh a, Chhetri hi a lehpel ve leh a ni.