Eriksen dinhmun a ṭha zel

Danish team doctor Morten Boesen chuan Denmark leh Finland an inkhelh ṭuma tlu Christian Eriksen chu lungphu chawl vanga tlu a nih thu a sawi a, medical team che rang lo se Eriksen kha chhan hman a ni kher lo mai thei.

Boesen chuan, "Eriksen kha kan chan hman ṭhelh a, a lungphu a pangngai leh theih nan theihtawp kan chhuah zui a ni. Eng ang takin nge thihna nen an inhnaih hman ka sawi thei lo a, mahse, khawl hmanga theihtawp kan chhuah vawi khatnaah khan kan chhan lehnghal thei hram a ni.

"Tuna 'test' kan neihah chuan engkim a ṭhain a lang rih a, engvanga khatianga buai ta thut kha nge a nih, tih hi tunah chuan kan hrilhfiah thei rih lo," a ti a, Danish team thuneitu lam chuan, "A dinhmun a ṭha a, test dang neih chhunzawm turin damdawi in lamah a awm chhunzawm rih ang," an ti zui.

Denmark coach Kasper Hjulmand chuan, "Christian dinhmun a ṭhain amah pawh a buai lo a, kan hun tawnte ngaihtuahin a ṭhiante tan pawh thu hriat nuam tak a ni," tiin a sawi ve bawk.

Eriksen hian Hjulmand-a hnenah hian, "Kei aiin hrehawm inti zawk niin ka hria a, kei chuan training ka nei thei mai dawn tawhah ka inngai zawk a ni," tiin a lo hrilh.