Nottingham-ah Konta a thiam ber

Pathianni zan khan Nottingham Open khelh zawh a ni a, tun hnai kum li chhunga a nomawi chawi lehna hmasa ni turin Johanna Konta a champion. Britain nula hian Zhang Shuai chu 6-2, 6-1 in a hneh.

Seeded pakhatna Konta hian set khatnaah Chinese player service hi vawi hnih a chhuhsak a, set hnuhnung zawkah vawi thum chhuhsak leh bawkin nuamsa takin hnehna a chang.

Kum 30 mi Konta-'n title a lak hnuhnung ber chu 2017 April thla a khelh Miami Open daih tawh kha a ni, Grass court inelna huanga a hlawhtlin avang hian tun thla tawp lama khelh tur Wimbledon atan inrintawkna a neih belh dawn.

Konta chuan, "Final ka khelh hnuhnung ṭhenkhatah ka chak lo, inrintawkna neih a harsa hle. Eng inelna pawh nise nomawi chawi hi engtik lai mahin a awlsam ngai lo, chuvangin ka tan chuan tun ṭuma mi hi a hlu," a ti.

Hripui leng vangin French Open khelh hun an sawn tlai a, hei vang hian grass court season tir lam a nghawng. Paris khawpuia inelna a zawh hmain Nottingham Open hi an lo khelh hnan a ni.

Season hmasa khan hri leng vangin Wimbledon an khel thei lo, indopui pahnihna hnua an ṭhulh lehna hmasa ber a ni hial. Kuminah erawh khelh a ni dawn; June 28 aṭangin All England Club-ah inelna lian hi an khel ang.