ISL club-ten foreigner tihtlem an thlawp

Indian Super League club-te chuan 2021-22 season aṭanga ram pawn player nei tlem tura All India Football Federation (AIFF)-in an ngenna chu a thuphungin an pawm a, chiang taka thutlukna siam erawh a la awm lo. 

AIFF hnuaia technical committee chuan Asian Football Confederation (AFC) dan awm sa anga 3+1 foreigner rule hman hi an duh a, hei hi AIFF chuan a pawmsak. 

3+1 foreigner dan hnuaiah chuan club tinin ram pawn player pali bak khelmualah a ruala an luhtir a rem dawn lo a, an zinga pakhat hi Asia khawmualpui ram mi a nih ngei a ngai bawk. 

I League chuan season thar lo awm tur aṭangin he dan hi an hmang nghal dawn a, ISL erawh ram pawn player contract nei lai an awm nual avangin 2021-22 season aṭanga he dan hi hmang tura tih an ni. 

ISL enkawltu Football Sports Development Limited (FSDL) chuan he ngenna hi ngaihtuahin a thu phungin an remti a, mahse official taka an pawm hma chu thla khat hun pe turin an ngen. 

FSDL hian a hnuaia club-te chu hemi chungchangah hian an ngaihdan sawi turin lehkha a thawn tawh a, club tam zawkin 3+1 rule hman hi an remti. Hetihrual hian club-in foreign player squad-a a neih theih zatah erawh ngaihdan in ang lo a awm thung. 

ISL club ṭhenkhat chuan 3+1 dan hi hman a nih dawn tho chuan a tam berah squad-a ram pawn player panga neih theih chu a tawk an ti a, team ṭhenkhatin pasarih tal ni turin an duh thung - bul ṭantu player zinga Asian player telh kher lo tura rawtna a awm bawk.