Team hmuhnawm Italy an inlan dawn

Euro 2020 champion tura beisei zingah mi tam takin Italy beisei lo mah se an match hmasa ber an en zawhah an ngaihdan an thlak nghal - Azzurri hian team ṭha Turkey chu 3-0 in inkhelh an zirtir.

Zaninah he team hmuhnawm Italy hi an inlan leh dawn a, team nem zawk Switzerland nen Rome khawpuiah zan dar 12:30 hian an inkhel ang. Swiss team hi Wales nen 1-1 a inhnehtawk hlim an ni thung. Switzerland hian Wales lakah inkhel thunun mah se goal khat chauh an khung avangin point khata an lungawi a ṭul a, zaninah team ṭha zawk Italy barakhaih an tum dawn.

Group A-a team palite inkhel hmasa ber aṭanga teh chuan Italy leh Switzerland an chungnung a, zanin hi group hmahruaitu nih inchuhna 'inkhel' ti pawhin sawi ila, sawi uar lutuk kan ni lo ang.

Mancini thawnthu
World Cup 2018 khel tura an tlin zawh loh hnuah Italy-in coach Giampiero Ventura an ban a, Mancini lam an hawi nghal - hetihlaia Italian media-te ṭawngkam chu, "Italy-in Mancini an mamawh a, Mancini hian Italy-a mamawh bawk," tih hi a ni.

Italy team an uai thla mek a, an player ṭhate an kum a tam ve ṭan ta bawk. Hei vang hian an team khai chhuak leh turin coach tawnhriat nei ṭha, Italian mi ni bawk an mamawh a, a chhanna chu Mancini a ni tlat.

Hetihlai hian Manchester City boss hlui hian Russian club Zenit Saint Petersburg a enkawl a, top level-a kir leh tura a mamawh chhanna chu 'Italy' a ni a, lawm takin sawmna a pawm.

Mancini-a'n vanneihna leh vanduaina a nei. Italy-a enkawl hian senior player tam tak rin tur a nei tawh lo. Chu chu a vanduaina a ni. Mahse, a duh ang thala player thlak kual turin zalenna a nei a, chu chu a vanneihna a ni.

Mancini-a Italy
Inter Milan boss hluiin Italy-a enkawl hnuah match 33-a kaihruai a, vawi 24 an chak - vawi sarih draw an nei a, vawi hnih chiah an la tlawm! Mancini-a win percentage hi 72.73% a tling hial a, ropui tak a ni.

Mancini-a'n major tournament-a Italy a kaihhruaina match hmasa berah hnehna a chang nghal zat a, mahse, inelna ṭan hma hauh khan tum a lo nei lawk fel diam tawh. Italian boss chuan, "Tuna ka tum ber chu nipui huna Portonovo (a seilenna khaw bul) khuaa chawlh hman a, champion coach ni chunga autograph ziah a ni," a ti a, champion aia hniam a mitthla lo.

Mancini-a beisei ram thleng tur chuan zaninah chak phawt a ṭul a, Italy hian Switzerland hi an hneh a nih chuan last 16 an lut chiang ang.

A ngai tein
Italy-in he thu buatsaih a nih thleng hian Alessandro Florenzi tih loh chu player inhliam langsar sawi tur an nei lo a, hei vang hian Mancini-a'n Turkey laka game hmuhnawm pho chhuaktu a team ngai bawk kha danglam lutuk loin a rin leh a rinawm.

Midfielder thiam bik Marco Verratti-a'n dam lam pan leh tawh mah se bul a ṭan a la rinawm chiah lo a, a awm loh hlanin Sassuolo midfielder Manuel Locatelli-a'n a hmun ruak a hnawh khat hneh hle - Jorginho leh Nicolo Barella te nen midfield-ah ding ho leh tura beisei an ni.

Turkey laka chawn hliam vanga lakchhuah Florenzi-a'n he thu buatsaih a nih lai hian ngai a la awh leh lo a, a hmun ruak luah tura Napoli right back Giovanni Di Lorenzo a awm avangin manganna tur a awm lo.

Italy tan tlarhmaah Domenico Berardi, Ciro Immobile leh Lorenzo Insigne-te an inkawp leh a nih chuan an hmuhnawm dawn a, Switzerland tan inven uluk a ṭul dawn.

Swiss an zam lo
Wales lakah Switzerland-in 65% zet ball chang chungin vawi 18 ngawt shot an nei a, an shot neih zinga pali chu target zawnah a kal - an goal khung zat erawh goal khat a ni a, goal khat an chhuah tel avangin point khat chiah an hlawh chhuak.

Switzerland tan Wales angin Italy lakah chetsual a thiang lo a, last 16 luh an duh a nih chuan fimkhur a ṭul dawn - mahse, coach Vladimir Petkovic hi Serie A lama Lazio lo enkawl tawh a nih avangin Italian player a hrechiang.

Zanina an inkhelhna tur hmun Stadio Olimpico hi Lazio-in home game an khelh nana an hman a ni a, Lazio-a kum khat leh a chanve a cham chhunga Coppa Italia nomawi chawi thei Petkovic-a'n a hriatchian khelmualah hnehna chan theih a inbeisei ang.

Wales laka an khelh dan en chuan Arsenal midfielder Granit Xhaka, Atalanta midfielder Remo Freuler, Liverpool midfielder Xherdan Shaqiri leh Borussia Mönchengladbach forward Breel Embolo-te an inman a, danglamna thlen turin an ṭha tawk.