Lionel Messi freekick mawi a tawk zo lo

Diego Maradona puala hun an hmanin hlut a hlawh a, a ti ngaihnawm zualtu chu Lionel Messi-a freekick mawi a ni. Mahse, Argentina hian an goal neih an hum zawh loh avangin Chile nen 1-1 in an inhnehtawk.

Nimin zing Copa America group A inkhel dangah Paraguay chuan Bolivia 3-1 in an hneh a, point thum hmuin table hmahruaitu an ni. Uruguay chuan an group match hmasa ber atan June 19, Inrinni zingah Argentina an hmachhawn ang.

A hma boruak
Nikum November thla khan khawvelin football player ropui bik a chan a, a hming chu Diego Maradona a ni; kum 60 mi niin lungphu chawl vangin a thi a, a thihna hian khawvel a nghawng hneh hle.

Maradona thih hnua Argentina-in Copa America an khelh lehna hmasa berah an theihnghilh lo. Olympic Stadium, Rio de Janeiro-ah inkhel an ṭan hmain Maradona pualin hun hman a ni a, a damlai a chetla lai video an ti chhuak.

Mipui hmuh turin Maradona-a'n ball a sep kual lai leh World Cup 1986-a an ram a champion pui laite tihlan a ni a, player ropui bik puala hun hman hian inkhel entu mai bakah Argentina jersey hatute thinglungah nasa takin thu a sawi tih a lang.

Freekick mawi
Lionel Scaloni-a'n 4-3-3 hmangin a naute a rem a, tlarhmaah Messi, Lautaro Martinez leh Nicolas Gonzalez te an intlar. Martinez leh Nico Gonzalez te hian hun ṭha bik nei ve ve mah se an khung thei lo.

Minute 33-naah Argentina lamin freekick an hmu, captain Messi-a'n goal kilah tlak thlawh lutin Chile keeper Claudio Bravo-a'n ball kalna tur lam ring fuh mah se dan phak a ni lo; Barcelona forward hian ram tana a goal 73 khungna a ni.

Chile lamin hliam vangin Alexis Sanchez an chhawr thei lo a, an goal nawr a na tawk lo. Second half-ah penalty an hmu hlauh, midfielder Arturo Vidal-a pet chu Emiliano Martínez-a'n lo dang mah se a per chu Eduardo Vargas-a'n a tauh lut.

Goal dang a ngai
Messi-a'n a ṭhiante tan kawng a sialsak fo a, hun tawp dawn lamah Gonzalez tan ṭum hnih ṭha zetin a siamsak. Mahse, VfB Stuttgart forward hian a hmasa zawkah goal zawna pet theih loh bakah, yard 8 leka hnaia keeper chauh a hmachhawn tawhin goal chungah a tauh over bawk.

Hun tawp dawn minute 10 chauh awm tawhah bench aṭangin Sergio Aguero a rawn lut. Barcelona striker thar hian chakna goal khung turin remchang a insiam thei lo a, inkhel thunun chungin an chak zo ta lo.

Scaloni-a naute hian an tlarhnung phui lo an tuar fo. Tun hnai ni 10 chhungin inkhel pathum an hmachhawnah goal an khung hmasa vek a, mahse heng inkhelah hian goal an chhuah leh vek avangin chak ni hmel an hmu lo - tlarhnung remphui a ngai takzet.

Nomawi a ngai
Tournament an khelh ṭan hmain Messi-a'n Argentina tana nomawi chawi chu a duhthusam sang ber a nih thu a sawi a, an ram hi hlawhtlinna chanpui a chak takzet tih a chiang - kum 33 mi a nih tawh avangin hun a ngah tawh bik lo.

Tun thla tawpa kum 34 ni tur Messi chuan, "Hriatthiam a harsa hle, inkhel ṭhenkhatah hi chuan dawhthei taka kan nghah a ngaih chang a awm. Ball chan hnem a pawimawh a, chutih rualin kan chet ran zual a ngai tel bawk," tiin a sawi.

Hun ṭha bik vawi hnih hlahtu striker Gonzalez chuan a tihsual pawmin, "Goal hmaah ka hriam lehzual a ngai, tun ami aia ṭha zawka khel tur kha ka ni," a ti a, goal khung lo mah se a ṭhiante nen an inkhel pumpui chu ṭha thawkhata a hriat thu a sawi bawk.

Chile an lawm
Chile hian an player ṭha Sanchez an la chhawr thei lo a, coach thar Martin Lasarte kaihhruaina hnuaia indin thar mek an nih bawk avangin tun hma lama team nghet tak ang kha an la ni phak lo. Mahse, ṭum dang ang bawkin an huaisen rah an seng.

Captain Vidal chuan, "Leo khan kawng hrang hrangin min chhaih buai hneh hle, kan tan chuan point khat hmuh hi a hlu takzet. Kan khelh dan phung kan siamrem mek a, chuvangin kan tan engkim mai kha a awlsam lo," a ti.

Chile hian 2015 Copa America final-ah Messi awmna Argentina hi penalty shoot out-ah an hneh a, nomawi an chawi. Tun hnaiah World Cup qualifier khel dun lehin 1-1 in an inhnehtawk. Team ṭha lo zawk anga ngaih ni mah se an tlawm duh ngai bik lo.