Grass court-ah Federer a inlan

Roger Federer chuan Wimbledon inbuatsaihna a nei ṭan, grass court inelna a hmachhawnah hian nuamsa takin a chak bik lo. Thawhṭanni zan khan player langsar lo Ilya Ivashka chu 7-6 (7-4), 7-5 a hnehin Halle Open last 16 a inhlangkai.

Germany rama inlenaah hian tun hmain Federer-a'n vawi 10 ngawt hlawhtlinna a lo chang tawh a, grass court inelna lian Wimbledon inbuatsaih nan a hmang ṭhin; tun ṭumah pawh hian nomawi a beisei leh ang.

Swiss star hi a khup hliam vawi hnih zai a ni a, a hnu lamah beisei angin a la khel chhuak leh lo. French Open-ah khan inlanin khel ṭha viau mah se a khup lamah harsatna tenau a neih vangin a inhnukdawk ta zawk.

Paris khawpui aṭanga a haw chhan kha hliam vang chu ni bawk mah se ṭha taka Wimbledon khelh a duh vang a ni. All England Club a pan hmain Halle-ah hlawhtlinna a chang a nih chuan atan duhthusam a ni ang.

Federer chuan, "Ka service ṭha a, ka hnungzâng pawh a na lo. Tuna ka mamawh ber chu ṭha taka inkhel thei tura taksa peng tinreng a inpeih a ni," a ti a, grass court season a hmang thei leh mipui lamin an lo dawnsawn danah lawmthu a sawi bawk.

Grand Slam vawi 20 champion tawh Federer tan Halle Open nomawi hi awlsam taka chawi ngawt theih a ni dawn bik lo. A kaltluang a nih chuan quarterfinal-ah Daniil Medvedev a hmachhawn thei dawn, final-ah Alexander Zverev nen an intum thei dawn bawk a ni.

Inkhel dangah seeded parukna Roberto Bautista Agut chu world number 50 Sebastian Korda lakah 6-3, 7-6 (7-0) in a chak lo. Korda hi 1998 Australian Open champion Petr Korda fapa a ni.