NBA Playoff Hawks leh Clippers an chak
Nimin zing NBA conference semifinal inkhelah Atlanta Hawks leh Los Angeles Clippers ten hnehna an chang a, team pahnih hi chak lo mai tura ngaih ni hman mah se tunah chuan conference final an beiseina a sang leh ta hle.
Eastern Conference semifinal game 4-ah Hawks hian Philadelphia 76ers chu 103-100 in an hneh a, best of seven series khelh turah team pahnih hi 2-2 in an inhnehtawk mek; June 17, Ningani zingah game 5 an khel leh ang.
Atlanta Hawks tan Trae Young chuan point 25 neiin ani aia nei hnem an awm lo. Young-a hian assist vawi 18 nei bawkin basketball inelna sang berah match khatah assist a neih hnem ber ṭum a tawng bawk, inkhel hmuhnawm taka an chak theih nan a thawh hlawk hle.
Seeded pakhatna Philadelphia lamin inkhel bul ṭan fuhin hma an hruai fal hman viau, quarter hnihna an khelh lai phei chuan point 18-in an sang zawk; mahse inkhel chawhnu lamah an zuih avangin a chak lo zawkah an ṭang.
Western Conference semifinal lamah Los Angeles Clippers chuan Utah Jazz lakah 118-104 in hnehna an chang a, team pahnih hi vawi hnih ve ve chak tawhin conference final lut tur zawk a la chiang lo.
Clippers hi game hmasa pahnihah an chak loh avangin an dinhmun a chhe hman hle. Mahse a zawnin an chak ve leh tawh a, June 17, Ningani zinga an chak leh a nih ngat chuan an beisei phak loh ram an hnaih hle tawh dawn tihna a ni.
LA Clippers tan hian Kawhi Leonard leh Paul George ten point 31 ve ve an nei a, point 24 neitu Marcus Morris Sr. a khelh ṭhat bawk avangin hlauthawng lutuk loin an chak. Jazz player zingah Donovan Mitchell (37 points) bak langsar khawpa khel ṭha an awm lo.
