Chak mamawh Russia-in Finland hmachhawn dawn
Euro 2020-a an match hmasa berah Finland-in rin loh takin Denmark an hneh a, point khat lek an hlawh chhuak leh a nih pawhin last 16 lut turin beiseina a sang tawh ang.
Finland hian zanin dar 6:30-ah Russia an hmachhawn dawn a, Russia erawh Belgium ngam lo hlim an nih avangin knockout round beisei tur chuan chak ngei ngei an mamawh thung.
Euro 2020-ah group tina a sang pahnih chu last 16 lut chiang tur an ni a, pathumna zinga a ti ṭha plaite an lut dawn bawk - Finland-in Denmark an hneh miau avangin an tan kawng a inhawng zau ta hle.
Tuarna phena malsawmna!
Finland-in Euro-a an match hmasa berah Denmark an hmachhawn a, 1-0 in an chak. He inkhelah hian khawvel barakhaihtu thil pakhat a thleng a, Denmark thiampuipa Christian Eriksen chu lung lam fel lohna avangin inkhelh laiin a tlu.
Eriksen-a chunga thil thlengin Danish player-te a nghawng na tih a hriat a, first half-a inkhel thunun em emtu team hian a hma angin an khel tawh lo.
Finland-in Joel Pohjanpalo ‚lu‘ hmangin goal awmchhun an khung a, Denmark tan Pierre-Emile Hojbjerg-a‘n holam taka penalty a hlah bawk avangin 1-0 in Finland an chak - Finland hian an shot neih awmchhun hmangin goal an khung!
Fak tlak Hradecky
Denmark lakah Finland keeper Hradecky a langsar a, Bayer Leverkusen keeper ‚kher‘ hi an goal vengtu ni lo se Finland hian point thum an la nei lo ang.
Finland boss Markku Kanerva-a‘n tlarhnung ven a ngai pawimawh leh ngeiin a rinawm a, Hradecky a pawimawh leh dawn tihna a ni tel bawk.
Chutihrualin Teemu Pukki theihnghilh a thiang lo a, Finland striker hi Russia-in an ngai thutak tawk lo a nih chuan an tisual ang - Denmark laka goal khungtu Pohjanpalo-a‘n a goal khung vangin inrintawkna a neih belh ang tih a chiang a, Union Berlin striker hian goal khung leh ngei a tum ang.
Russia beiseina
St Petersburg khawpuia inkhel an nih avangin Russia-in rin an hlawh a, mahse, an match hmasa berah Belgium an ngam lo nghal - world number 1 team lakah 3-0 ngawtin an tlawm.
Russia hi Belgium laka an chak beiseiawm lo mah se si thum fai ngawta tlawm tura ngaih erawh an ni lo a, an goal chhuah pahnih chu an tihsual vanga lut ve ve a ni bawk - insiamṭhat an mamawh.
Russia boss Stanislav Cherchesov chuan, „Tihsual hotein danglamna a thlen ṭhin a ni,“ a ti a, a naute tan chetsual loh chu an tih tur pawimawh a nih thu a sawi - Finland lakah chetsual a thiang tawh lo.
Engtin nge?
Russia-in Belgium laka hliam vangin tawnhriat nei ṭha defender Yuri Zhirkov an chhawr thei dawn lo a, Belgium laka hliam vanga lakchhuah ngai ve tho midfielder Daler Kuzyayev pawh a inlan a rinawm loh zawk.
Counter-attacking game-ah Finland an innghat leh ang tih a chiang a, Russia-in Belgium laka an hman tawh sa 4-2-3-1 an thlak danglam viau a rinawm lem loh.
Russian football journalist lar Artur Petrosyan chuan,“ An training naa a lan dan chuan tlarhnungah defender pali bawk an tlar a rinawm a, Belgium laka an tlawm hnuah insiamṭhain team boruak a ṭha em em bawk,“ a ti - Finland tan thu hriat nuam a ni lo ang.