Scotland veltu Schick

Kum 23 hnuah Scotland-in inelna lian an mual ngeiah an hmachhawn a, Czech Republic lakah 2-0 in an tlawm. June 14, Thawhṭanni zan Hampden Park-a goal hnih hi Czech striker Patrik Schick-a khung a ni.

June 14, Thawhṭanni zana Bayer Leverkusen striker Schick-a goal hnihna hi goal ropui bik a ni a, halfway line bul aṭangin a pet goal. Match khelh tur ṭhahnem tak la awm mah se Schick-a goal hi 'Goal of the Tournament' ni thei tur khawpin a ṭha.

Schick a class
Inelna lianah striker goal khung thei neih a pawimawh a, Czech Republic-in Patrik Schick an kawl. Minute 42-naah Vladimir Coufal cross chu Schick-a'n ṭha zetin a tauh goal.

Bayer Leverkusen striker Schick hi 6ft 2in-a sang hi boruakah a ṭha a, chutihrualin a ke pawh a ṭha tel. Minute 52-naah Scotland-in ball an hloh a, Schick-a'n ball chu umin halfway line a pel hret aṭangin dah ding loin a pet nghal.

Scotland keeper David Marshall-a'n a theihtawpin tlan let mah se Schick-a'n a pet ṭhat em avangin dan ngaihna a awm lo. Schick-a goal khungna hi 49.7 meters a ni a, hemi hmaa Euro bika goal hla ber chu Germany midfielder Torsten Frings a khung a ni a, Euro 2004 khan 38.6 metres aṭangin a khung.

Schick chuan, "Keeper kha dinna ka en a, a rawn tawlh chhuak hma hle. Ka en nawn leh a, goal-ah ka pet ta a ni," tiin a pet goal dan a sawi. Scotland keeper Marshall kha a tawlh chhuak hma hret a nih pawhin Schick-a goal khung sawi hnawng a thiang lo - a ṭha thlawt.

Hun ṭha a bawhpelh
Scotland hian nikum kum tawp lam khan Nations League-ah Czech Republic hi vawi hnih an hneh tawh a, tun ṭumah hian an mualah an khelh avangin inrintawkna pawh an nei sang hle. Amaherawhchu Premier League star Andrew Robertson, Scott Mc Tominay leh John McGinn te kawltu Scotland-in hun ṭha an bawhpelh.

Hampden Park-ah Scotland-in goal khung lo mah se vanneih ṭum chu ni se chak thei an ni. First half-ah John McGinn-a'n chance ṭha a hlah a, captain Robertson pawhin a hun ṭha neih chu goal-ah ṭha zetin pet mah se keeper Tomas Vaclik-a'n a dan sak.

Manchester United mid-fielder Scott McTominay-a'n tharum nen box chhungah a khalh lut a, penalty beiseiin tlu mah se referee-in penalty turah a ngai lo. Second half-ah Southampton forward Che Adams rawn lutin Scotland goal nawr na sawt mah se goal an khung thei chuang lo.

Eng nge an sawi?
Czech Republic coach Jaroslav Silhavy chuan, "A pawimawh lai ber chu Scotland goal bawh na tak kan chelh thei kha a ni. Hun harsa kan paltlang hnuah goal kan khung a, kan khel ṭha chiah. Goal hnihna kha chu a ṭha thlawt a, Patrik Schick khan hna a ti awlsam," tiin a sawi.

Scotland defender Andy Robertson chuan, "Kan inringtawk a, kan phur a, kan chance neih kan hmang ṭangkai lo kha a pawi ta a ni. Goal chance kan insiam ngei a, chance ṭha bik pawh kan insiam. Amaherawhchu goal kan khung thei tlat lo. Kan khingpui Czech erawhin an hunṭha neih an bawhpelh lo," tiin a sawi.

Scotland hian June 18, Zirtawpni zan dar 12:30-ah England an hmachhawn dawn a, an inkhelhna tur hi Wembley Stadium a ni ang. Group D inkhel dangah Croatia leh Czech Republic te Hampden Park-ah Zirtawpni zan dar 9:30-ah an inkhel ve bawk ang.