Moyes-a'n contract pawtsei

David Moyes chuan West Ham United tan season thum daih contract a ziak thar, inremna an ziah hnuah Moyes chuan hun rei zawk Hammers a enkawl thei tur chu a lawm thu a sawi chhuak.

Kum 58 mi Moyes hian 2019 December thla khan Manuel Pellegrini thlakin West Ham hi a enkawl a, division hniam lama tlak mai hlahthawnawma awm kha a chhan chhuak a ni.

Season hmasa khan Premier League-ah West Ham hi point 65 a hmuh pui a, English football inelna sang bera point an hmuh san ber ṭum an tawng hial; parukna niin Europa League an khel dawn.

Scottish manager Moyes chuan, "West Ham United hi ka awm duhna hmuh a ni a, inremna rei zawk kan nei hi a lawmawm hle. Tun hnai thla 15 chhungin kawng hrang hrangin hmasawnna kan nei a, hmasawn zel pawh kan tum.

"Hmasawnna ṭha leh ngelnghet neih tumin hma kan la a, club thuneitu lam aṭanga thlawpna kan dawn ṭhat bakah thil tum sang tak kan nei hian kan lawmna a ti zual," tiin a sawi.