Beisei phak lo Turkey leh Wales inkhel dawn

Euro 2020-ah team beisei phak lo pawla sawi chu Turkey leh Wales an ni der tawh a, team pahnih hi zanin dar 9:30-ah an intawng dawn.

Turkey-in an match hmasa berah Italy an ngam loh avangin last 16 luh beiseina nei tur chuan tlawm loh a ngai a, Wales-in Switzerland an draw hram avangin an dinhmun a him bik lo. Gareth Bale-a telna Wales hian an group-a team ṭha ber Italy an la hmachhawn dawn avangin hmabak a hautak a, zaninah point thum aia tlem hmuh a thiang lo.

A tawi zawnga sawi chuan zaninah chak mamawh ve ve an inkhel dawn a, Baku Olympic Stadium-ah inkhel a hmuhnawm loh ring suh.

Wales danglam zawk?
Robert Page-a'n, "Switzer-land laka ka team khelh dan avangin ka lawm a, mahse, a ngai tho ka ring nawn dawn tihna a ni lo. Turkey hi Swiss team nen an khelh dan a inang lo a, kan team khelh dan tur kan ngaihtuah nawn ang," a ti.

Wales boss hian Switzerland lakah 4-1-4-1 formation hmangin fimkhur takin a team a khelhtir a, midfield laiah Joe Morrell leh Aaron Ramsey-te an awm a, mual sir aṭanga goal nawr turin Gareth Bale leh David James-a khelhtir a, tlarhmaah Kieffer Moore chu maltlat tir a ni.

Tlarhnungah defender pali remin Joe Allen chu midfield leh tlarhnung thlunzawm tura dah a ni. Page-a ṭawngkam aṭanga en chuan Switzerland laka goal awmchhun khungtu Moore hi inthlak danglamna a awm dawn a nih chuan tuar ber tur a ni.

Page hian 3-4-3 leh 4-3-3 formation a hmang fo a, he formation a hman chuan tlarhmaah 'flase nine' angin Harry Wilson a lut ṭhin a, Switzerland laka inlan lo Wilson hi Liverpool player ni mah se season hman zawh tak kha Cardiff City-ah loan-in hun a hmang a, match 38-a khelhsakah goal sarih khungin assist vawi 12 a nei a, danglamna thlen turin a ṭha tawk.

Turkey lam hi
Italy lakah Turkey boss Senol Gunes a huaisen tawk lo a, 4-1-4-1 formation a hmang - mahse, squad en mai pawha team pangngai tak hian an theihna angin an khel chhuak lo a, 3-0 ngawtin an tlawm.

Gunes-a thutlukna avangin Turkey-in sawisel an hlawh a, Turkey international hlui Abdullah Ercan chuan, "Italy laka kan inkhel khan eng team pawh tum ila kan thiam dana khelh mai a fuhzia min hmuhtir a ni.

"Kan team hian defensive game khelh phawt hnua inthlak danglam leh turin squad a nei lo," a ti a, Gunes chu attacking football khel ngam turin a duh.

Chutihrual chuan Gunes hi dem theih a ni lo. Turkey tan 4-4-2 leh 4-2-3-1 a hmang ngun a, team ṭha a tum dawnin 4-1-4-1 a hmang fo - he formation hmang hian Netherlands pawh kumtir khan 4-2 in an lo hneh tawh.

Goal mamawh
Gunes-a'n last 16 luh beiseina nei tur chuan chak a mamawh miau a, hei vang hian a hman thiam sa 4-4-2 a hmang leh a nih pawhin a awm lo hran lo a, Wales lakah attacking football hmuh a beiseiawm zawk.

Kum 35 mi striker Burak Yilmaz bawk hi Turkey tan chuan a pawimawh leh dawn a, a kum a tam ve deuh tawh avanga a tlan chak tawk loh avang erawh chuan Italy lakah pawh harsatna a awm leh ṭhin.

Turkey tana pawimawh ber chu midfield lamin hna an thawh ṭhat a ni a, Yilmaz hian ball a hmu ṭha a nih phawt chuan box chhungah chuan ani aia striker duhthlan tur bik an tam lo - season hman zawh takah Lille tan goal 18-a khung tih theihnghilh loh a ṭha.

Gunes-a'n Italy laka bul ṭan lo zingah Leicester City winger Cengiz Under, Sassuolo defensive midfielder Kaan Ayhan leh Fenerbahce midfielder Irfan Can Kahveci-te bul a ṭantir mai thei nia sawi a ni a, anni hian bul an ṭan a nih chuan fan-ten Italy laka an result aia result ṭha zawk an beisei ang.