Stadium khatin Wimbledon an en dawn

Tennis inelna lian leh ngaihhlut Wimbledon chu tun thla chawhnu lam aṭangin khelh a ni dawn. July 11, Pathianni zana final an khelh hunah chuan Centre Court khatin mipui an pungkhawm thei tawh dawn.

Inelna hi a tir lamah chuan a hmuna entu 50% an awm thei dawn, final hi stadium khata entu an awm a nih chuan hripui len hnua inkhel stadium khata entu awm lehna hmasa ber a ni ang. Centre Court-ah hian mipui 15,000 an leng a ni.

Tournament buat-saihtu All England Club chuan thuchhuah siamin, "Sorkar, hriselna lama hna thawk leh tualchhung mi pawimawh te nen lungrual taka hna kan thawkho thei hi ka lawm takzet.

"June 28 aṭangin inelna kan nei ṭan dawn a, a tir lamah entu 50% awm thei tur ringawt pawh hi a lawmawm. Mipa leh hmeichhe singles final phei chu stadium khatin entu an awm thei tawh ang," an ti.

Season hmasa khan Wimbledon hi hrileng vangin an khel thei lo. England rama tennis inelna lian hi an ṭhulh mai mai ngai lo, nikum khan indopui pahnihna hnua an khelh loh lehna hmasa ber a ni hial - kuminah erawh ropui leh hlawhtling taka neih theih a rinawm.