Lewy a nil, Poland an chak lo
Robert Lewandowski hoa khel Poland chuan Euro 2020 match hmasa berah Slovakia 2-1 in an hneh lo. June 14, Thawhṭanni zanah hian Slovakia-in Bayern Munich goal khung khawl Lewy an dah ṭha a, point thum hlu tak an hlawh chhuak.
St Petersburg-a inkhelah Robert Mak thawh ṭhat vangin Poland keeper Wojciech Szczesny-a'n an lamah a ti lut. Second half ṭan chiahah Karol Linetty hmangin Poland-in an siphurh sut mah se Slovakia tan Milan Skriniar-a'n minute 69-naah chakna goal a khung.
Poland-in team nem ber tura ngaih Slovakia lakah point an hmuh loh avangin hmabak a harsa dawn. Robert Lewandowski a telna team hian Spain leh Sweden an la hmachhawn ang.
Slovakia an nghet
Slovakia-in an khingpui an hre chiang a, Poland-in Lewandowski an kawl tih hriain uluk takin Bayern Munich striker hi an veng. First half-ah team ṭha zawk a ngaih Poland aiin Slovakia an khel ṭha zawk a, goal chance pawh an ngah zawk.
Minute 18-naah Robert Mak chuan vei lam aṭangin Poland defender Bartosz Bereszynski kap karah a khung a, chance insiam chawpin ṭha zetin goal-ah a pet. Ferencváros winger Mak-a ball pet hian goal ban a per a, hemi per let hian Wojciech Szczesny fuhin goal-ah a lut.
Poland-in ball chang tamin nawr ngial tum mah se Slovakia tlarhnung an su hawng thei lo. Lewandowski-a'n chance ṭha a nei lo a, St Petersburg khelmualah a thiam bikna hmuh tur a awm lo. Goal hmaah Slovakia an hlauhawm zawk a, captain Marek Hamsik-a'n a thiam a la theihnghilh lo a, halftime-ah hmahruaitu nih an phu zawk.
Danglamna Red Card
Second half ṭantirhah Poland-in bul an ṭan ṭha a, Karol Linetty hmangin minute 46-naah siphurh an sut. Poland goal khung hi a mawi a, team goal dik tak a ni. Leeds midfielder Mateusz Klich leh Maciej Rubus ten ball an inpek kual hnuah Linetty hian a khung a, Torino midfielder Linetty-a'n chance ṭha a neih theih nan Lewy-a'n class zetin defender a hruai sawn.
Poland an khel ṭha zui a, amaherawhchu kum 31 mi midfielder Grzegorz Krychowiak chu minute 62-naah hnawhchhuah a ni a, Euro 2020-a red card hmu hmasa ber a ni. Krychowiak hian ram tan vawi 81 khel tawh mah se hun pawimawhah a tawnrhriat a hmang ṭangkai lo a, ṭul lo zetin Jakub Hromada a rah lui a, yellow card vawi hnihna hmu.
Chhandamtu Skriniar
Slovakia-in player 10 laka khel Poland lakah bet reng an tum lo a, an nawr let a, a tawpah goal an hlawh chhuak. Minute 69-naah corner aṭanga ball kal chu Milan Skriniar-a'n box chhungah ṭha tak la thlain goal-ah kawh zetin a pet lut.
Skriniar hi Serie A-a Inter Milan champion puitu defender a ni a, striker ṭha bik goal dan angin goal pawimawh a khung. Slovakia defender Skriniar hian Lewandowski a veng ṭha a, Poland an hnehna kawngah player pawimawh a ni.
Hun tawp lamah Poland-in Lewandowski, Jan Bednarek leh Karol Swiderski te hmangin siphurh an sut teuh a, amaherawhchu goal a luh miah loh avangin chak phu zawk Slovakia 2-1 in an chak.
Eng nge an sawi?
Slovakia captain Marek Hamsik chuan, "Mi tlemte chauhin kan chak an ring chungin kan chak. Kan result lawmawm dan hi thuin ka sawifiah thiam lo," tiin a sawi.
Slovakia coach Stefan Tarkovic chuan, "Lewandowski kan dah ṭha thei a, first half ṭha tak kan khel a ni. Second half ṭantirhah kan mu thlu zauh a, mah se goal kan khung belh avangin result ṭha tak kan nei a ni," tiin an khelh ṭhat thu a sawi.