Bolivia lakah Paraguay tho chhuak

Nimin zing Copa America inkhelah Paraguay chuan si phur hmasa zet mah se Bolivia chu 3-1 in an lehthal a, point thum hmuin team panga awmna Group A-ah hma an hruai.

Bolivia hian hri leng vangin an player ṭha panga ngawt an chhawr thei lo, inlan thei lo zingah hian striker Marcelo Martins pawh a tel; ani hi ram tana match a khelh hnuhnung pasariha goal sarih khung thei a ni hial.

Kum 1963 hnu lamah Bolovia hian Copa America-ah Paraguay hi an la hneh ngai lo. Mahse, minute 10-na lekah penalty an hmu a, Erwin Savedra hmanga goal khungin hma an hruai.

Mahse, inkhel chawhnu lamah team ṭha zawk nihna a lang. Alejandro Romero hmanga siphurh an sut hnuah Angel Romero chuan goal hnih a khung belh a, goal an chhuah belh tawh loh avangin Paraguay an chak.

Group A inkhel dangah Argentina leh Chile te 1-1 in an inhnehtawk a, group pakhata team panga awmte hi an inkhelh kual vek hnuah a sang palinin quarterfinal an lut dawn - a hniam ber pakhat chauh an tla dawn tihna a ni.