Murray dinhmun a chiang thei lo

Hliam vangin hun rei tak a buai ta, tun thlengin Andy Murray hi 100%-in a la dam fel thei lo niin a lang. Britain tlangval hian Grand Slam tournament khel tur chuan a la inpeih vak lo tih a sawi.

World number 1 hlui hi a khelbawr hliam vangin season thum chhung a inkhel muamal thei tawh lo. Hnungzâng nain a tlak buak bawk a, tennis chawlhsan tur angin lang ṭhin mah se a la beidawng duh bik lo.

Britain player Murray chuan, "Tun hnaiah training ka nei ṭha, ka taksa dinhmun pawh a ṭha a, mahse duhthusam vek erawh a ni la chiah lo. Ka tana pawimawh ber chu natna nei loa inkhelh theih a ni, chumi tur chuan theihtawp ka chhuah zel.

"Ka hriselna dinhmun hi zawhnain a khat a ni ta ber a, infiammi tan chuan thu hriat nuam lo leh lungchhiat thlak a ni. Amaherawhchu ka la beidawng lo, engtik niah emaw chuan ṭha takin inelna lian ka la hmachhawn leh theih hi ka beisei tlat a ni," a ti.

Kum 34 mi Murray hian Italian Open kha doubles huangah a khel a, last 16-ah an tla. Tunkar chhunga khelh tur Queen's Club Championship-ah a inlan dawn a, nizan khan a match hmasa berah Benoit Paire nen an inkhel a, result kan hre hman lo.

June 28 aṭangin grass court inelna lian Wimbledon khelh a ni dawn a, vawi hnih champion tawh Murray hian harsatna dang a nei leh a nih lem loh chuan singles huanga inlan ngei a tum, chumi atan chuan inbuatsaihna a nei mek.