Henderson a inhliam, a aiah Ramsdale

England-in chanchin thar an nei a, Manchester United keeper Dean Henderson inhliam vangin a hmun ruakah Sheffield United goalkeeper Aaron Ramsdale chu koh a ni.

Ramsdale hi England provisional squad-a player 33 zingah khan a tel a, mahse, coach Gareth Southgate-a'n player pasarih a chhawk zingah a tel zui.

Kum 23 mi keeper tan a ṭhianpa inhliam zarah vanneihna a her chhuak a, Henderson hian a khel bawrah hliam a tawrh avangin training mumal pawh a nei thei dawn lo a ni.

Ramsdale hian England camp a zawm hmain Covid-19 test paltlang ṭul angte a paltlang ve leh phawt ang a, Three Lions squad-a keeper pathumna ni turin Everton keeper Jordan Pickford leh West Brom keeper Sam Johnstone-te a zawm zui ang.

Mahse, Ramsdale tan inelnaa inlan erawh beisei viau chi niin a lang lo a, tun dinhmunah Pickford chu England tan first choice keeper niin Johnstone hi second choice a ni thung.

UEFA dan hnuaiah inelna ṭan ni tawh mah se medical lam thil a nih chuan keeper hi thlak theih an ni a, England hian Henderson thlak turin Ramsdale hi an ko ta a ni.

Three Lions hian chanchin lawmawm an nei tel a, Croatia laka hliam tenau nei Harry Kane leh John Stones-te chuan nimin khan an ṭhiante rualin training an nei thei a, hetihlai hian Jack Grealish chuan a ṭhiante zawm loin a hranin training a nei thung.

Aston Villa captain hi season hman zawh takah khan ngal hliam vangin a talbuai a, thla thum zet a inlan thei lo. Tuna training a neih hran chhan erawh a inhliam vang ni loin a hliam lo neih tawh sa avang hian Three Lions lam an fimkhur vang a ni zawk.