France-in Germany hneh turin Own Goal mamawh

France-in Euro 2020 champion tura rinkai an nihzia pholangin Allianz Arena-ah Germany 1-0 in an hneh. Thawhlehni zan inkhel hmuhnawm bika goal awm chhun khungtu hi German defender Mats Hummels a ni a, an lamah a pet goal.

Joachim Low-a hoten world champion Les Bleus laka an tlawm zawh chiahah European champion Portugal an hmachhawn lehnghal dawn a, June 19, Inrinni zan hian Allianz Arena-ah an inhmachhawn dawn.

Didier Deschamps hote hi Inrinni zan dar 6:30-ah Hungary nen an inkhel thung ang.

World Champion
France-in 2018 World Cup an champion khan team ṭha bera ngaih an ni hrim hrim a, kum thum hnuah an la ṭha zawk cheuah a ngaih theih. Les Bleus bul ṭantu zingah Karim Benzema rawn awm belhin Kylian Mbappe leh Antoine Griezmann ten an thlawp a, midfield-ah N'Golo Kante, Paul Pogba leh Adrien Rabiot-te awmin an vai hian 'world class' vek an ni.

Tlarhnungah Raphael Varane leh Presnel Kimpembe te inkawpin mual sirah Bayern Munich wing back pahnih Benjamin Pavard leh Lucas Hernandez te an awm. Captain Hugo Lloris-a'n goal a veng a, Didier Deschamps-a hote hi position tinah panna lai reng a awm lo.

France elpha thei tura ngaih zingah Germany an tel a, Joachim Low-a'n bul ṭantu zingah Thomas Muller leh Hummels te a telh. Midfield-ah Toni Kroos leh Ilkay Gundogan te an awm bakah right back an neih ṭhat tawk loh vangin Bayern midfielder Joshua Kimmich chu mual ding lamah a awm.

Germany-in out and out striker an nei lo a, Serge Gnabry chu a khelhna ngai lohah awmin hma tawngah dah a ni. Bayern forward Gnabry hi Thomas Muller leh Chelsea midfielder Kai Havertz ten an thlawp.

Pogba magic
Germany-in bul an ṭan ṭha hret a, ball pawh an chang tam. Amaherawhchu Low-a hoten a tawp khar dan an thiam lo. France erawhin tlarhmaah Mbappe, Benzema leh Griezmann te an neih miau avangin goal hmaah an hlauhawm a, Paul Pogba thiamzia sawi hmaih a thiang lo.

Pogba hian Kante leh Rabiot-te kiangah a theihna tak tak a pholang a, France Pogba leh Manchester United Pobga an inang lo an tih ṭhin chu a takin a hmuh theih.

English club-ah chuan Pogba hi Fred leh Scott McTominay ten an thlawp a, a bula khelte an inthlauh chu thuhran ni se Ole Gunnar Solskjaer aiin Didier Deschamps-a'n French midfielder chhawr dan a thiam zawk, a tih theih bawk.

France-in minute 20-ah goal hmahruai an khung a, Pogba-a khaw hawi zau vang leh ball pet thiam vang a ni. French midfielder hian mual ding lam aṭangin vei lama awm Hernandez-a tana pet nuam tawk takin a pet thla a, France left back cross hi Hummels-a'n an lamah a ti lut.

Germany hian midfield-ah Gundogan leh Kroos te an nei a, Real Madrid midfielder hian vawi 110 pass attempt neiin ball sem darh nasa mah se an rorum tawk lo. Bayern midfielder Leon Goretzka awm loh a lang a, 'midfield battle'-ah tharum leh skill nei ṭha Pogba telna France an chak.

Ropui hmabak Mbappe
Tun dinhmunah Kylian Mbappe hi Cristiano Ronaldo leh Lionel Messi te huangah dah a la harsa rih a, amaherawhchu khawvel player ropui ber ni turin Mbappe hian theihna a nei. PSG forward hian FIFA World Cup nomawi a chawi tawh a, a hmabak chu Euro C'ship nomawi a ni.

French midfielder Pogba leh player-te'n hmun awl zau laiah ball an pek apiangin Mbappe hian a umpha deuh zel a, a hlauhawm zel bawk. PSG forward hi goal khat bakah ṭhiante vawi khat siam thei tur a ni a, offside vangin a vanduai.

Germany laka Mbappe tlan chak lai bera a speed chu 31.3 km/hr a ni a, PSG forward hi hei aia chakin a la tlan thei. A tlan chak lai berin 36 km/hr a tlan angin record a ni a, offside trap-a tâng lo tura a insiamrem theih chuan France goal bawh a na lehzual ang.

Fak phu Deschamps
Didier Deschamps-a'n thil tum nghet tak a nei a, 4-3-3 formation hmangin player tinin an hna an tlin vek. France hian Germany lakah hian 38% ball an chang a, vawi li chiah shot neiin goal zawnah vawi khat chauh an pet.

Statistics-ah shot vawi 10 lai nei Die Mannschaft chungnung mah se Les Bleus an khel ṭha zawk. France hian Germany keeper leh defence inkar hmun ruak chu Mbappe tlan chakna hmangin an hmang ṭangkai a, goal an khung hma avangin ball possession aiin goal venhim a pawimawh tih an hria.

France goal nawr apiang a hlauhawm deuh zel a, Deschamps-a hoten an duhna laiah tak an chhu chat chat tiin a sawi theih. Les Bleus vanneih zan ni se, goal thum talin an chak thei ang.

Tla thei Germany?
Germany-in France lakah team ṭha an ni tih a pholang a, chak lo mah se an khelh dan thlirin point hmuh an phu. Amaherawhchu Low-a'n starting eleven ṭha ber leh player lut tura ṭha ber a la hre lo tih a hriat theih.

German manager Thomas Tuchel-a'n Chelsea-a a hman ṭangkai Kai Havertz-a'n a theihna angin a la khel chhuak lo, bench aṭanga rawn lut Timo Werner a la bo zual.

Germany-in target man an nei lo a, Germany-a Bayern player-ten tlarhmaah Robert Lewandowski an kawl tawh loh avangin an ṭhatna tak a lang chhuak thei lo. Lewy pawh hian Poland tana an game hmasa berah Bayern player-te a mamawh tih a lang ve bawk.

France nena an inkhelah Thomas Muller-a'n ṭangkaina a nei mang lo a, Hummels erawh an lamah tilut mah se a la ṭangkai hle. Germany keeper Manuel Neuer a la ṭha reng a, sweeper-keeper hna a tlin.

Germany-in midfield tihchak an mamawh a, Low-a'n right back-a khel turin Lukas Klostermann a ring ngam a nih chuan midfield-ah Kimmich a dah thei ang. Amaherawchu Germany hian team ṭha Portugal an hmachhawn dawn a, inenchhinna chi a ni tawh lo. An chak lo a nih chuan tlak theihna kawng a inhawng zau sawt dawn.

Team ṭha tak lakah ṭha takin kan khel a ni. Ka player-te an inpeih tih ka hria a, ka beisei ang ngeiin an khel ṭha. Goal hnih khung kha kan hlat lo a, khung thei ilang chuan nuam sa takin kan chak thei ang. Amaherawhchu kan khung miau loh avangin hun tawp lam kha a harsat phah ta a ni. - Didier Deschamps, France coach

Kan inhnehtawk a, a tawp thlengin kan bei. Ka player-te demna tur ka nei lo, an theihna zawng zawng an chhuah avangin ka fak zawk a ni. - Joachim Low, Germany coach

Tute nge inlan?
France: Lloris; Pavard, Varane, Kimpembe, Hernández; Rabiot (Dembélé 90+4), Kanté, Pogba; Benzema (Tolisso 89), Griezmann, Mbappé

Germany: Neuer; Ginter (Can 88), Hummels, Rüdiger; Kimmich, Gündoğan, Kroos, Gosens (Volland 88); Havertz (Sané 74), Müller; Gnabry (Werner 74)