Premier League fixtures a chhuak

European football league-a ngaihven hlawh ber Premier League fixtures tihchhuah a ni a, August 14-ah 2021-22 season atana match hmasa ber chu khelh a ni ang.

Tottenham Hotspur boss thar tan bul ṭan dan a hautak dawn a, season thara an match hmasa ber atan champion lai Manchester City an mikhual dawn - Premier League a hmuhnawm nghal dawn tihna a ni.

City hi an fixture-ah an lawm lutuk lo mai thei. Spurs zawhah hian Norwich, Arsenal, Leicester City, Southampton, Chelsea leh Liverpool an hmachhawn zui dawn!

Manchester United tan a awlsam dawn bik lo - an match hmasa berah Leeds United nen an inkhel dawn a, Marcelo Bielsa team-te hmuhnawmzia hretu tan Old Trafford-a inkhel tur hi en a châkawm tawh khawp ang.

Liverpool-in Norwich City lenchilh chungin bul an ṭan dawn a, Jurgen Klopp leh a nauten point thum nen season bul ṭan an beisei dawn tihna a ni. Norwich hian City, Leicester City leh Arsenal an tum zui dawn!

Champions League nomawi chawitu Chelsea-in Crystal Palace an mikhual nghal dawn a, Thomas Tuchel-a team tan point thuma bul ṭan theihna tur niin a lang.

Season duhawm lo tak an hman avangin Arsenal fan-ten season thar an nghakhlel tawh a, an bul ṭanna tur pawh Premier League kai thar Brentford an nih avangin awlsam tura ngaih a ni.

Manchester derby hmasa ber chu November 11-ah Old Trafford-ah khelh a ni ang a, Spurs leh Arsenal ten September 25-ah North London derby an khel ang a, Merseyside derby chu November 30-ah Goodison Park-ah khelh a ni ang.

Season hman zawh tak tawp lamah khan stadium khat loin fan-ten an club ṭante inkhel an en thei leh tawh a, Premier League thuneitute chuan season thar ṭantir aṭanga stadium khata fans an kal theih dan tur an ngaihtuah mek thu an sawi - away fans thlenga inkhel entir theih an beisei.

Tennis inelna ngaihven hlawh Wimbledon chu tun thla ni 26-ah khelh ṭan a ni dawn a, July-a final khelh a nih hunah chuan stadium khatin inkhel entu an awm thei ang - UK a outdoor sport-ah chuan Covid-19 hnua stadium khata entu an awm hmasak ber tur a ni ang.

Euro 2020 khelh mekah pawh Wembley chuan knockout round aṭanga a match thlen turah stadium-a leng zat 50% luh theih dan an ruahman a, mi 45,000 velin a hmunah inkhel an en thei dawn tihna a ni.