Belgium hmaah Eriksen-a tel lohna Denmark
Zanin dar 9:30 hian Denmark-in Copenhagen-ah champion rinkai zinga mi Belgium an hmachhawn dawn. Danish Dynamite-in an player pawimawh Cristian Eriksen an chhawr theih loh laiin Belgium erawhin Kevin de Bruyne an chhawr thei tawh ang.
Eriksen-a nghawng
Denmark-in an match hmasa berah Finland an hmachhawn a, an muala a khelh bakah an khingpui Finland an nih bawk avangin chak tura ngaih an ni.
Amaherawhchu khelmualah thil duhawm loh a thleng a, khelmualah thi chhawngin Eriksen-a awm avangin inkhel tihtawp lailawk a ṭul hial.
Denmark thuneituten thutlukna an siam a, inkhelh hun sawn theih a ni nachungin inkhelh chhunzawm an thlang. Danish Dynamite te Iceland lakah an vanduai zui a, inhnemna tur erawh a awm - Eriksen a dam ṭha.
Point mamawh
Denmark training-naah Eriksen chiah a awm lo a, nui ri hriat tur awm a, player-te hlim hmel an lanchhuahtir leh thei tawh bawk. Training-na hmun hi press mite chauhin en loin Denmark lal fapa Frederik pawhin a thlir.
Coach Kasper Hjulmand-a'n last 16 lut turin point a mamawh tih a hrechiang a, chutihrualin player theihna sang ringawt a ni tawh dawn lo, inkhel tura inpeih a thlan a ṭul dawn. Danish Dynamite hian squad ṭha tak an nei a, Belgium laka goal khung turin Yussuf Poulsen leh Martin Braithwaite te an pawimawh ang.
De Bruyne a dam
Belgium-in an match hmasa berah Russia 3-0 in an hneh a, Romelu Lukaku-a'n goal hnih a khung. Inter Milan striker Lukaku ringawt pawh hi ven tham a ni a, chutihrualin Kevin de Bruyne a dam tawh avangin Denmark tan hna a harsa dawn.
Manchester City midfielder De Bruyne hian bul a ṭan a rinawm lo a, second half-ah erawh a inlan theih a rinawm. Russia-in Belgium tan harsatna an siam pha lo a, Denmark lakah hian Roberto Martinez-a hoten fiahna tak tak an hmachhawn ang.
Bul ṭan tura beiseite
Denmark: Schmeichel; Wass, Kjaer, Christensen, Maehle; Delaney, Hojbjerg, Jensen; Poulsen, Dolberg, Braithwaite
Belgium: Courtois; Alderweireld, Boyata, Vermaelen; Meunier, Tielemans, Dendoncker, T.Hazard; Mertens, Lukaku, Carrasco