Mallorca Open-ah Djokovic

French Open champion hlim Novak Djokovic tan Wimbledon atan inbuatsaih chhunzawm nghal a ngai a, kar leh chhunga khelh tur Mallorca Open-ah world number 1 hi a inlan dawn - singles ni loin doubles huangah a inkhel ang.

June 26 aṭangin Wimbledon khelh a ni dawn a, champion lai Serbian star hian tun season atan grass court-ah singles match khel loin All England Club a pan dawn tihna a ni.

Tun hmain Mallorca Open hi a la awm ngai lo, kuminah hian a vawi khat nan an khel dawn. Spain ramah chuan clay court inelna an khel ṭhin; tuna mi hi grass court inelna awm chhun leh hmasa ber a ni nghal bawk ang.

Inelna buatsaihtu lam chuan thuchhuah siamin, "Grand Slam vawi 19 champion tawh Novak Djokovic chu Mallorca-ah a lo kal dawn, doubles match a khel ang," an ti.

Player dangte pawhin Wimbledon inbuatsaihna hi an nei mek. Halle Open lamah world number 2 Daniil Medvedev a inlan a, mahse a match hmasa berah Russian player hi Jan-Lennard Struff lakah 7-6 (8-6), 6-3 in a chak lo.

Germany rama inelna neih mekah hian tualchhung player Alexander Zverev erawh a chak. Seeded pathumna Zverev hian Dominik Koepfer chu 6-4, 3-6, 6-3 in a hneh a, a match lehpekah chuan Ugo Humbert nen an inkhel leh ang.

Halle-ah hian Roger Federer pawh a inlan, Swiss star hian a match hmasa berah Ilya Ivashka a hneh. Tun tournament hi Wimbledon inbuatsaihna a nih avangin Federer tan a pawimawh takzet a ni.