Hungary stadium ngawih tirtu chu Ronaldo

Cristiano Ronaldo inkhelh thu ziah chuan goal a khung thu ziah tel a ngai ṭhin a, chumi zuitu chu record a ni chawk.

Thawhlehni zan khan Euro 2020-a an match hmasa berah Portugal chuan 3-0 in Hungary an hneh a, Ronaldo-a'n goal hnih khungin Euro-a goal khung hnem ber record thar a siam. Hungary nena an intawn hma hian Ronaldo hi French legend Michel Platini nen goal kua ve ve khungin Euro-a goal khung hnem ber an ni a, Hungary laka goal hnih khungin Platini a tlansan.

Portugal goal khat dang hi Raphael Guerreiro khung a ni a, goal thum hi minute 80 hnua lut vek a ni - Portugal tan thlamuang taka awm hun erawh a la ni lo a, group stage match-ah France leh Germany-in an hmuak.

Hungary an tlo
Inkhel en loa result ringawt en tan chuan Portugal hi awlsam takin an chak emaw tih mai tur a ni a, mahse, scoreline hi inkhel hrilhfiah nan a tling tawk lo.

Mi 60,000 chuang lenna Ferenc Puskás Stadium-ah khat tlatin fans an pungkhawm a, an thawm ringawt pawh major tournament la khel ngai lo player tan chuan zamna tham a ni. Mipuiin Hungary an pui ṭha a, rei tak chu Portugal an chelh thei - an theihna an hrechiang a, tharum leh huaisenna hmangin team ṭha zawk Portugal an bei let a, a bik takin striker pasang Adam Szalai a khel ṭha takzet.

Hungary tan hian substitute Szabolcs Schon chuan goal a khung hmasa zawkah a inngai hial a, mahse, assistant referee-in offside a phar avangin goal-ah pawmsak an ni lo.

Ronaldo & Jota
Portugal tan tlarhmaah Ronaldo, Jota leh Bernardo Silva an inkawp a, first half-a langsar ber chu hliam vanga tun season-a talbuai ngun tak Jota chu a ni.

Liverpool forward Jota hian first half-ah chance duhawm vawi hnih ngawt a nei a, Hungarian goalkeeper Peter Gulacsi chuan a dansak ve ve. Jota hian a chance neih hmasak zawkah ball pass mai turin Ronaldo a nei a, mahse, kum 24 mi forward hian Juventus forward pek aiin amaha pet a thlang a, Gulacsi-a'n a dang ṭha hle.

Liverpool forward Jota ball pek loh avangin Ronaldo-a'n khelmualah a lungawi lohna a tilang a, mahse, kum 36 mi forward hian tauh luhna remchang a neihah a tauh lut lo a, hnai set sawt aṭanga pet goal theih mai tur chu a pet over luah bawk.

A tawpah Portugal
Hungary-in minute 80 a nih thlengin Portugal an la chelh thei a, team pahnihin goal an la khung loh avangin point an insem mai dawn niin a lang hman - mahse, minute 84-naah Portugal an vannei.

Borussia Dortmund left back Raphael Guerreiro-a shot satliah tak chuan Hungary defender khel ṭha Willi Orban a per a, keeper khel ṭha Gulacsi-a'n ball kal dan a chhut hman lo.

Hun tawp nan minute ruk chauh a awm tawh tihah team ṭha zawkin goal an khung a, Hungary tan thawhlehna beisei chi a ni tawh lo. Portugal erawh an phur tawlh tawlh a, minute 87-naah penalty an hlawh chhuak.

Bench aṭanga luhtir Rafa Silva lakah Orban a foul a, penalty a chawi. Penalty pet thiam pahnih Bruno Fernandes leh Ronaldo awm mah se Portugal team-a thu zawk Ronaldo a lo pen chhuak a, goal-a chantir turin harsatna a nei lo.

Ronaldo Ropuia
Kum 36 mi Ronaldo-a'n penalty a pet goal hnuah Portugal hi 2-0 a chak mai tura ngaih an ni a, mahse, Real Madrid legend Ronaldo-a'n a lo la duhtawk ve hauh lo.

Hun pek belh minute hnihnaah a goal hnihna a khung zui a, Rafa Silva nen mawi taka ball an inpek kual hnuah Gulacsi tlan hel chungin a pet goal - player class bik ke aṭanga chhuak awm renga mawi a ni. Ronaldo-a'n Portugal tan match 176-a khelhah goal 106-a khung tling ta a, international football-a goal khung hnem ber Ali Daei record khum turin goal thum khung belh chiah a ngai ta.

Bayern Munich tan pawha lo khel tawh Daei hian Iran tan match 149-a khelhah goal 109-a khung a, Ronaldo-a'n a record a khum dawn leh dawn loh ai chuan, "Engtikah nge a khum ang?" tih chu zawhna zawk a ni a, group stage-ah a khum hman a nih ngat chuan Portugal tan last 16 luh loh a harsa tawh ang.

Hungary Stadium engvangin nge a khah?
Khawpui 11-in Euro 2020 an inthlen ṭawm a, inelna thlengtu zingah Budapest khawpui a tel - Hungary-ah an inkhel ta ngei a, Portugal leh Hungary inkhel lai enin stadium khat tlatin fans an pungkhawm. Tun hmaa thil pangngai ang maia ngaih kha Covid-19 vangin thil mak ang hiala sawi a ngai ta a, khawpui danga stadium ṭhenkhatin stadium-a leng zat 25% vel bak an thlen ngam loh laia stadium khat tlat an pungkhawm bik hian zawhna a ti tam hle.

Hungarian Football Federation chuan stadium khata fans an kal theih chhan chu sorkarin chak taka vaccine a sem theih vang a nih thu an sawi a, "Hungarian fans, a theih chin chinin an dam chhunga an sawi tawh tur tawnhriat ropui an tawn hi kan duh a ni," an ti bawk. Hei mai a ni lo - Hungary prime minister Viktor Orban hi football ngaina leh atchilhtu a ni a, stadium-a fans a tam thei ang ber an kal theihna tur hian ram chhunga Covid-19 inkaihhruaina dan pawh a kaihhruai sorkar chuan a thlah dul ang hiala sawi a ni.

Hungary hian mawlmang takin inkaihhruaina dan hi an thlahdul erawh a ni lo. Stadium lut turin dan khirh tak erawh an zam tho a, he dan zawm thei lo tan luh ve ngawt theih a ni lo. Puskas Arena-a inkhel en turte chu Covid-19 hri danna la tawh ngei an ni tur a ni a, hri danna an la tawh ngei a ni tih chianna certificate an ken ngei a ngai. Hei mai a ni lo. Ticket tinah stadium luh hun tur dar zat bituk sak ṭheuh an ni a, he dar zat ruahman saa kal lo tan ticket nei pawh ni se luh theih a ni lo - hei hi vawi khata stadium lut ho tam lutuk tur ven nana tih a ni.