Copa America : Brazil inlan a hun leh ta
World champion vawi nga ni tawh Brazil chuan Zirtawpni zing dar 5:30-ah Peru an hmachhawn leh dawn. Tite naute hian Copa America 2021 an match hmasa zawkah Venezuela an hneh tawh a, tun ṭumah pawh hian chak zawk tura rinkai an ni.
Zanin dar 2:30 hian Colombia leh Venezuela te an inhmachhawn dawn bawk. Group B aṭangin team pali an tlang dawn a, quarterfinal-a team nem deuh tum theih nan group match khelh ṭhat a pawimawh ang.
Tlarhma lam
Brazil coach Tite-a'n team nghet ṭha tak a din tawh a, chutih rualin tlarhma lama khel tur player a ngah avangin thutlukna a la siam fel thei bik lo niin a lang, tun ṭumah hian tu nge tlarhma laiah khel ang tih chu zawhna a ni.
Copa atana training a neih tam loh avangin Roberto Firmino chu Venezuela an hmachhawn ṭumin bench-ah dah a ni; Neymar, Richarlison leh Gabriel Jesus te an inkawp a, inkhel hmuhnawm an chhawp chhuak.
Thawhlehnia training an neihnaah coach hian Everton Ribeiro, Everton Soares leh Gabriel Barbosa te a inkawptir a, ram tana inkawp tlak an nih thu a sawi, tun ṭumah hian Brazil team hran deuh hlawk kan hmu a nih pawhin a mak lo ang.
Player ṭhenkhat a siksawi a nih pawhin Neymar chu khawih chet a nih a rinawm lo. Paris Saint-Germain forward hian ram tan match 106 a khelh aṭangin goal 67 a khung tawh, Brazil tana goal khung hnem lamah Pele a phak lohna chu goal 10 chauh a ni tawh.
In enchhinna?
Copa America an khelh hma khan Brazil coach Tite-a'n tun inelna chu player enchhin nan an hman tel tur thu a sawi a, mi ṭhenkhat chuan Tite thusawi hi helh deuh mah se, nakkuma neih tur World Cup a thlir miau avangin rilru a sawhsawn a rinawm lo.
Chelsea defender Thiago Silva a inlan a rinawm a, ani hian tlarhnung laiah Marquinhos thlakin Eder Militao nen an din dun a rinawm. Liverpool midfielder Fabinho pawhin Fred emaw Casemiro emaw zawk a thlak a rinawm bawk.
Tite-a'n a duh ang thlapin team la din lo mah se Fred erawhin an ram team chu an inpeih tawk tawhah a ngai. Manchester United midfielder chuan, "World Cup khelh thut ngai pawh ni se Brazil chu a inpeih tawh," tiin a sawi.
Brazil player leh mipui zingah Copa America thlen duh lotu an awm a, mahse match khatna ṭha taka an khelh hnuah erawh sawiselna a nep tawh, tun ṭumah hian hnehna an chang zui leh a nih chuan hri leng karah football an sawi thar zual ngeiin a rinawm.
Match khatna
Group pakhatah team pakhat an awm avangin an khelh hun a inrual vek thei lo. Peru tan an match hmasa ber a ni dawn a, inelna neih hnuhnung berah khan final lutin Brazil hi 3-1 in an ngam lo, rinkai ni lo mah se team chhia chu an ni bik lo tih a chiang.
Peru hi Copa America 2019 finalist ni mah se tun hnaiah an ṭha tawk lo. World Cup qualifying match ruk an khelh tawh chinah vawi li an tlawm a, ṭum khat chiah chak ni hmel an la hmu - team 10 inel zinga a hniam ber an ni.
World Cup khel lo thei dinhmuna an din avangin Ricardo Gareca naute hian harh chhuah an mamawh takzet. Chanchin lawmawm an neih erawh qualifier-a an chak awmchhun hi an match hnuhnung bera mi a ni a, chhunzawm theih an tum ang.
Peru coach Ricardo Gareca chuan, "Mipui rin leh beisei san lutuk nih chu a nawm lohna a awm thei. Keini team chuan hlauh tur kan nei dawn lo, kan hma a tih tur awm hlen chhuak turin theihtawp kan chhuah tawp mai dawn a ni," a ti.
