Spurs leh Roma-in coach an inthleng hnai!

Tottenham Hotspur-in an coach chanchin ngah Jose Mourinho an ban hnua a hmun ruak luah tura an lakluh hnaih ber chu Paulo Fonseca a ni a, kum 48 mi coach hi Mourinho-a'n a zawm tak AS Roma-in May thlaa an ban tak coach kha a ni!

Spurs hian Mourinho an ban hnuah a hmun ruak luah tur coach an lalut thei lawk lo a, an inhmuh len angin coach dangin an hmu lian lo ni berin a lang - a tawpah Fonseca lam an hawi a, he thuziak i chhiar meuh chuan an inlalut fel tawh hial mai thei.

Tottenham hian April khan coach Mourinho chu a hna aṭangin an chawlhtir a, a tirah coach hrawl tak tak hming lam rik ni mah se London club zawm hi an châk hlawm lo.

Mourinho ban a nih hnuah RB Leipzig boss Julian Nagelsmann hming a ri ring viau a, mahse, kum 33 mi lek ni chunga khawvela coach langsar pawl ni tawh hian Bayern Munich zawm a thlang zawk.

Ajax coach Erik ten Hag leh Leicester City boss Brendan Rodgers hming lam rik zui a ni a, mahse, coach pahnih hian London pan tura an puanthuah tel buangbar ai chuan an club-a rinawm an thlang.

Spurs-in Mourinho an ban hmaa an coach Mauricio Pochettino thlengin an bia a, mahse, Argentine coach pawh hi a club enkawl lai Paris St-Germain-in chhuahtir tumna an neih loh thu an puan khum.

London club hian rin loh taka Inter Milan nena inṭhen Antonio Conte lam an hawi zui a, kum khata pound maktaduai 17 zet hlawh turin an inbia anga sawi awm mah se an inbiakna hi a tlawlh.

Conte hian, "Club hmachhawp leh ruahmannate ka duhdan nen a inan loh chuan club zawm a ṭulna ka hre lo a, sumin min tibuai ve lo," tiin Spurs nena an inrem theih loh hnu lawkah a sawi zui.

Hetiang boruak karah hian Spurs-in football managing director thar Fabio Paratici an lalut a, Juventus-a chief football officer hlui hian Fonseca hi a duh nia sawi a ni.

Fonseca hian FC Porto, Braga leh Shakhtar Donetsk pawh a lo enkawl tawh a, Donetsk-ah hian hlawhtling berin May, 2016 - June, 2019 chhung a cham a, Ukrainian Premier League (3), Ukrainian Cup (3) leh Ukrainian Super Cup (1) ah te a champion pui.

June 2019 khan Roma a zawm a, a season hmasa berah Serie A-ah pangana a nihpui a, season hman zawh takah khan Roma hi Serie A-ah pasarihna an ni a, Europa League semifinal an lut bawk.