India chak zo lo mah se an duh an hlawh chhuak

FIFA World Cup qualifier-a an match khelh tur chu India-in an khel zo ta a, Thawhlehni zan khan an match hnuhnung berah Afghanistan nen 1-1 in an inhnehtawk.

India-in hnehna chang zo lo mah se group E-ah pathumna ni chungin World Cup qualification second round an khar a, AFC Asian Cup 2023 qualifier third round an khelh theih phah dawn. Thawhlehni zan inkhelah hian Blue Tigers-in goal an khung lo - goal hmasa zawk hi Afghan keeper Ovays Azizi-a'n an lama a tih luh a ni a, Hossein Zamani chuan Afghanistan tan si phurh a sut.

Hun tawp thlengin goal dang a lut lo a, India-in an tum ber Asian Cup 2023 qualifier third round thleng mah se Afghanistan inhnehtawkpui hi result ṭha a ni lo.

Inkhel chu
India-in anni aia team chhe zawka ngaih Afghanistan lakah game an thunun thei lo a, inkhel ṭantir lamah inngam tawn viau mah se Afghan team an khel ṭha tawlh tawlh.

Blue Tigers midfield-te an che hleithei lo a, Bangladesh lama game siamtu Brandon Fernandes-a'n awmzia a nei lo a, Sunil Chhetri-a'n a chance neihte a chhawr bik loh avangin eng ruai an ang lo. Minute 75-naah India vanneihna a her chhuak a, Ashique-a ball cross naran tak chu Afghan keeper Azizi chuan a man nghet zo lo a, Danish division hniam lama khel ṭhin keeper hian India hi goal a 'khilai'.

Mahse, vanneihnain India lam a ṭang reng bik lo. Ashique-a siamsak chu Liston Colaco chuan a khung a, mahse, Ashique-a'n goal line pawnah ball a khawih hman avangin goal-ah pawm a ni lo.

Afghan chhanletna
Blue Tigers-a'n Azizi-a 'own goal' hi an chakpui mai tawh dawn niin a lang hman a, mahse, Afghanistan lamin ngaihdan dang an nei thung - minute 82-naah Hossein Zamani chuan mawi zetin si phurh a sut a, 1-1 in inkhel a tawp zui.

Afghanistan goal awmchhun khungtu Zamani hi kum 18 mi lek a ni a, Ajax leh Genoa academy-ah a awm ṭhin. February 2021 khan Dutch second division club Telstar a zawm a, Netherlands Under 15 tan a lo inlan tawh - Afghanistan tan match thum a khelhah goal hnih a khung tawh a, a chanchin hi kan la hre dawn chauhin a rinawm.

Masih Saighani chu Afghanistan tana bul ṭan zingah a tel a, German division hniam lam aṭanga a career ṭantu centre back hian 2017-18 season khan Aizawl FC tan a lo khel tawh a, I League bakah Mizoram Premier League thlengin a inlan.

India squad-ah Lunglei tlangval Lallianzuala Chhangte leh Lalengmawia (Apuia) an awm a, Vaivakawn rawlthar Apuia hi Afghanistan lakah bench aṭanga luhtir a ni.

India beiseina
Asian Cup qualifier third round-ah India an inlan dawn a, he round-ah hian team 24-in inelna an hmachhawn dawn - team 22 chu World Cup qualifier aṭanga third round khel tura tling an ni a, team hnih dangin playoff round aṭangin an zawm ve leh ang.

World Cup qualifier hi Asian Cup khel tur zawnna a nih tel nghal avangin team langsar zual ho chu Asian Cup khel tur hian an inpetkai deuh vek tawh a, hei vang hian India hi tun dinhmunah chuan third round-ah pot 1-ah an tel phak.

Pot 1-ah hian ranking sang zual paruk an awm a, chutiang zel chuan pot 2, 3 & 4-ten a zui. Third round khelh a nih hnuah team 24 hi group parukah, team pali zel awmin ṭhen hran an ni ang a, group tinah pot tina ram pakhat zel kha an awm ang.

Pot hi draw neih a nih huna an ranking a zira tih danglam leh tur a ni a, pot 1-a awm India hi an awmna pot hi a la danglam leh thei tihna a ni a, an him lo.

Engtin zel?
June 24, 2021-ah Asian Cup 2023 qualifier third round-a inhmachhawn turte group pawhna hi neih a ni dawn a, hetih huna AFC-in FIFA ranking a rin tur chu June 18, 2021-a ranking chhuak thar ber a ni ang.

Tun dinhmunah chuan India hi FIFA ranking-ah 105-na an ni a, pot 1-ah hian an lang phak chiah chiah. Pot 2 aṭanga India hnaih bertu Thailand hi 106-na an ni a, Blue Tigers tan muttui lohna tham a ni.

Thailand hian point 1178.07 an nei mek a, India hian point 1184.36 an nei thung - chutihrual chuan Thailand hi tun thlaa an match pathumah an chak zo lo vek a, vawi khat draw result neiin vawi hnih an tlawm a, tun thlaa an match pathuma vawi khat tlawm a, vawi khat chak leh vawi khat draw nei India hi an umphak a rinawm loh.

Tuna a lan dan chuan India awmna pot 1-ah Uzbekistan, Jordan, Bahrain, Kyrgyzstan leh Palestine an awm avangin Blue Tigers-in heng team ṭha ho hi a awmpui thei dawn lo a, vanneihna a ni - pot 2-a Thailand leh Philippines te erawh group khata awmpui châkawm an ni bik lo.

Asian Cup chu
Asian Football Confederation (AFC) hnuaia ram leh ram inelna sang ber Asian Cup hi June 16, 2023-ah khelh ṭan a ni dawn a, ram 13 chu he inelnaah hian an tling chiang tawh.

China chuan he inelna a thlen dawn avang hian tling chiang tawh an ni a, Japan, Syria, Qatar, South Korea, Australia, Iran, United Arab Emirates leh Saudi Arabia chu India khelh zawh tak, World Cup qualifier second round-a an group hmahruaitu nih vanga tling an ni.

Group-a pahnihna ti ṭha pali zinga tel phak Iraq, Oman, Vietnam leh Lebanon-te chu Asian Cup khel tur hian an tling tawh bawk a, third round-a group tin hmahruaitu leh pahnihna ti ṭha pangain an zawm ang.

China-a khawpui hrang hrang 10-in an thlen tur inelnaah hian Euro 2020-a team inel zat 24 an inel dawn tihna a ni a, India tan Asian Cup khelh phak loh hi mualphona a ni ang.

World Cup chu
Qatar-in World Cup 2022-a thleng dawn a, inelna thlengtu an nih avangin Asia aṭang chuan World Cup khel tura tling chiang sa an ni - hemi bakah hian Asia khawmualpuiin hmun ruak 4.5 an nei.

FIFA World Cup qualification second round khelh zawh taka group tina pakhatna leh pahnihna ti ṭha zual pangate chu third round khel turin an tling - Qatar an tlin sa avangin chhiar tel an ni lo a, team 12 chiah an lut.

Third round-a tling team 12-te hi group pahnihah, team paruk ve ve awmin ṭhen an ni a, an inkhelh kual vek hnuah group pahniha a sang pahnih chu World Cup khel turin an tling ang.

Group pahniha pathumna ve ve chu playoff-ah an intawng leh ang a, 'single leg' inkhela chak zawk chuan inter-confederation playoff hmangin World Cup khelh beiseina an la nei leh thei dawn a ni.