Bucks ngam loh Kevin Durant

Kevin Durant-a'n a thiam thil a 'show' tak tak chu Milwaukee Bucks tan tih theih a awm lo. Durant-a point 49 neih hmangin Brooklyn Nets chuan 114-108 in Bucks an hneh. Nets hian Eastern Conference semifinal series-ah 3-2 in hma an hruai nghal bawk.

Nimin zing Barclays Center-a inkhelah Bucks lamin bul an ṭan fuh zawk a, quarter hmasa pahnihah an chungnung. Quarter thumna an khelh tir lamah phei chuan Nets hi point 17 zeta hniam zawk lai pawh an nei.

Mahse, hun pawimawh lai takin Durant a inlar a, point a neih hnem bakah rebound vawi 17 lain assist ringawt pawh vawi 10 a nei. Hun tawp dawnah 3-points a neih bakah free throw vawi thum a vawm lut vek bawk.

Nets hian hliam vangin Kyrie Irving an chhawr thei lo a, player pawimawh James Harden erawh lo kir leh tawhin minute 46 a inlan. Durant erawh minute 48 a inlan tluan a, a tawnhriat ṭha leh theihna sang bik a neih chu Nets tan rohlu a tling.

Kum 32 mi Durant chuan, "Mimal thil tih a ni lo, ka ṭhiante hnen aṭanga thlawpna ṭha tak ka dawn vang a ni," tiin a sawi a, Nets coach Steve Nash chuan a player chet dan chu hriatreng tawh tur a nih thu a sawi ve bawk.

Milwaukee thiampuipa Giannis Antetokounmpo pawhin Durant hi a dahsang hle. NBA Most Valuable Player vawi hnih ni tawh hian, a khingpui chu tun dinhmunah khawvela basketball player ṭha ber a nih thu a sawi hmiah.

Game 6 chu June 18, Zirtawpni zing dar 6:00 hian Milwaukee khelmual Fiserv Forum-ah an khel ang, he hmunah hian tun season chhungin Nets hi vawi li an inlan tawh a, chak ni hmel an la hmu miah lo.

Nets tan conference final lut turin vawi khat chak a tawk tawh. Mahse an inlan lehna tur hi an tana hmun ralṭi a nih miau avangin a awlsam dawn lo, dinhmun chhe zawka ding mek Bucks tan pawh tlang turin beisei a la sang.

Bucks coach Mike Budenholzer chuan, "Kevin khan fak a phu, engkim kha amah vanga danglam a ni. Chutih rualin semifinal series hi a la zo lo, keini lam chuan kan theihtawpin a tawp thlengin kan bei ve dawn," a ti.