Grass-ah Murray a chak

Andy Murray chuan Thawhlehni zan khan grass court season a hmang ṭan a, a singles match hmasa berah Benoit Paire chu 6-3, 6-2 a hnehin Queen's Club championship-ah last 16 a inhlangkai.

London khawpuia grass court inelnaah hian tun hmain Murray-a'n nomawi vawi nga a chawi tawh, tun hnaiah erawh hliam vangin a inlan tam lo. Kumin March thla hnuah singles match a khelhna hmasa ber a ni a, a chet vel danah duhthusam lo lai a tam.

Kum 34 mi Murray chuan, "Zep thu a cheng lo tennis khelh hi chu nuam ka tiin he infiamna hi chu ka hmangaih a ni. Mahse hrisel lohna vanga inkhelh tam tawk loh chu a hrehawm takzet a ni, engtikah nge harsatna hi a kian ang tih hriat a ni si lo.

"Hun a ral a, ka kum pawh a tam ve zel. Singles match ka khelh mumal lohna a rei tawh avangin a awlsam lo hle, chutih rualin ka chet vel danah khan lawmna tur tam tak a awm ve bawkin ka hria," tiin a sawi.

World number 124 Murray hian a match lehpekah chuan Matteo Berrettini a hmachhawn leh dawn, seeded pakhatna Berrettini hian amah ang bawka Italian player Stefano Travaglia chu 7-6(5), 7-6(4) in a lo hneh ve thung.

June 28 aṭangin Wimbledon khelh a ni dawn a, vawi hnih champion tawh Murray hi wildcard an pe a nih chuan grass court inelna lianah hian qualifier khelh hah ngai loin a inlan thei dawn a ni.